Ўзбекистон Президенти Шавкат Мирзиёев Хитой раиси Си Цзиньпинга миллий байрам — Хитой ташкил топган кун муносабати билан табриклади, деб хабар беради давлат раҳбарининг матбуот хизмати.
Шавкат Мирзиёев Хитой етакчисига мустаҳкам соғлик, оилавий бахт ва катта муваффақиятлар, дўст Хитой халқига эса тинчлик-осойишталик ва равнақ тилаган.
«Хитойнинг глобал хавфсизлик ва барқарорликни таъминлаш, янги таҳдид ва хатарларга, шу жумладан, иқлим ўзгариши ва COVID-19 пандемиясига қарши самарали курашишдаги фаол саъй-ҳаракатлари ва салмоқли ҳиссаси энг юксак эътирофга муносиб.
Кейинги йилларда Ўзбекистон ва Хитой ўртасидаги ўзаро ҳурмат, ишонч ва қўллаб-қувватлаш тамойилларига асосланган дўстлик, ҳар томонлама стратегик шериклик муносабатлари изчил ривожланиб бораётганини катта мамнуният билан қайд этмоқчиман.
Ўртамиздаги дўстона, ўзаро ишончга асосланган мустаҳкам шахсий муносабатларимизни чин дилдан эъзозлайман. Сизнинг кўп қиррали Ўзбекистон—Хитой ҳамкорлигига қаратаётган алоҳида эътиборингизни юксак қадрлайман.
Ишончим комил, сизнинг бўлажак давлат ташрифингиз ва Шанхай ҳамкорлик ташкилотининг Ўзбекистондаги саммитида иштирокингиз мамлакатларимиз ўртасидаги кенг кўламли шерикликни янги босқичга кўтаришга хизмат қилади», — дейилади мактубда.
Эслатиб ўтамиз, апрель ойида Президент Шавкат Мирзиёевнинг Си Цзиньпин билан бўлиб ўтган телефон суҳбати давомида Хитой раисининг Ўзбекистонга ташриф буюриши маълум бўлганди.
Мавзуга доир: Шавкат Мирзиёев Хитой ташқи ишлар вазирини қабул қилди
Изоҳ (0)