Давлат экология ва атроф-муҳитни муҳофаза қилиш қўмитаси раиси ўринбосари Исломбек Боқижонов, қўмитанинг Тошкент шаҳар бошқармаси ва ҳамкор ташкилотлар иштирокида Тошкентдаги Ўзбек миллий мақом санъати маркази қурилиётган ҳудудда рейд ўтказди. Бу ҳақда қўмита матбуот хизмати хабар берди.
Қурилиш Шайхонтоҳур тумани Олмазор кўчасидаги Ўзбекистон давлат консерваторияси маъмурий биноси ва «Пахтакор» стадиони ўртасида, Мустақиллик майдонидан тахминан ярим километр масофадаги ҳудудда (харита) амалга оширилмоқда.
Тезкор ўрганиш жараёнида қурилиш ишларини олиб бораётган «Косонсой бунёд қурилиш» МЧЖ томонидан мазкур ҳудуд тегишли рухсатномасиз ўраб олингани, бетон қориш қурилмаси экспертиза хулосасисиз жойлаштирилгани, яшнаб турган жойда қўй ва товуқлар боқилаётгани маълум бўлган.
Экология қўмитаси маълумотларига кўра, ўраб олинган ҳудудда жами 483 та дарахт бўлиб, шундан 58 таси қуригани аниқланган.
Қурилиш учун ажратилган ер майдонида ўсимлик дунёсига, аниқроғи 4 та дарахтга етказилган зарар миқдори қарийб 7 миллион сўм миқдорида ҳисобланган. Маданият вазирлигига қарашли ҳудудда эса етказилган зарар (58 та дарахт) миқдори эса салкам 243 миллион сўмдан иборат. Жами 62 туп ҳар хил турдаги манзарали ва мевали дарахтларга зиён келтирилган бўлса, шундан 6 таси кесиб ташланган.
Шунингдек, қурувчилар амалдаги талабларни бузган ҳолда қурилиш ҳудудида бетон қориш қурилмасини ўрнатган.
Ўрганиш жараёнида енгил конструкцияли девор олиб ташланди, 78 нафар ходим ва 7 та махсус техника ҳамда механизмлар жалб қилиниб, ҳудуд чиқиндилардан тўлиқ тозаланган.
Ҳудудни суғориш тизимини жорий таъмирлаш ишлари бошлаб юборилган. Кечки пайт фуқаролар ҳордиқ чиқаришларига шароит яратиш мақсадида тунги ёритиш тизимини қайта тиклаш, йўлаклар бўйлаб ўриндиқлар ўрнатиш юзасидан мутасаддиларга кўрсатма берилган.
Аввалроқ Сурхондарёда Бутунжаҳон биохилма-хилликни асраш кунида арчалар оммавий кесилгани, Самарқандда туман ҳокимлиги қаршисидаги ноёб дарахтлар кесиб ташлангани тўғрисида хабар берилганди.
Изоҳ (0)