АҚШ балиқчилик ва ёввойи табиат хизмати мамлакатда 22 турдаги жониворлар ва бир ўсимлик тури йўқ бўлиб кетганини маълум қилди, деб ёзади The New York Times.
«Бу 23 турнинг ҳар бири мамлакатимизнинг табиий мероси ва глобал биохилма-хиллиги учун қайтарилмас йўқотишдир. Бу эса йўқолиб кетишлар атроф-муҳитдаги антропоген ўзгаришларнинг натижаси экани ҳақида огоҳлантирувчи эслатма», — деди АҚШ балиқчилик ва ёввойи табиат хизмати.
Маълум қилинишича, оқ тумшуқли қизилиштон АҚШдаги энг йирик тур бўлган, лекин охирги марта уни 1944 йилда Луизианада кўришган. Бу тур 1967 йилда йўқолиб кетиш хавфи остидаги турлар рўйхатига киритилган.
Шунингдек, Бахман қўшиқчи қуши — Шимолий Америкадаги энг кам учрайдиган қушлардан бири. У 1967 йилда йўқолиб кетиш хавфида бўлган турлар рўйхатига киритилган.
АҚШда тузилган рўйхатга саккиз турдаги Гавайи қушлари ва Тинч океанининг Гуам оролидан келган Мариана кўршапалаклари киради. Йўқолиб кетганлар рўйхатидаги ўсимликнинг ватани ҳам Гавайи.
Изоҳ (0)