Берлин сайлов комиссияси раиси Петра Михаэлис истеъфога чиқди ва Германиядаги федерал сайловлар пайтида юз берган тартибсизликлар учун жавобгарликни ўз зиммасига олди. Бу ҳақда Deutsche Welle нашри хабар берди.
Маълум қилинишича, Берлин Сенати раисни давлат сайлов қўмитасининг 11 ва 14 сентябрдаги йиғилишларидан сўнг дарҳол лавозимидан озод қилмоқда. Михаэлис бу лавозимда 2010 йилдан буён ишлаб келаётганди.
«Мен ҳукумат расмийси сифатида сайлов шартлари бўйича сайлов участкаларини ўз ҳолатига қайтариш масъулиятини ўз зиммамга оламан. Мен Берлин Сенатидан мени лавозимимдан озод қилишини ва ворисимни тасдиқлашини сўрайман», — деган Михаэлис ва Берлин Сенатини октябрда унинг ўрнини эгаллайдиган номзод топишга чақирган.
26 сентябрь куни Берлин фуқаролари Бундестаг аъзоларини, шунингдек, шаҳар ва муниципалитет вакилларини сайлаган эди. Овоз бериш пайтида шаҳарда марафон бўлиб ўтган, бу сайлов бюллетенларини сайлов участкаларига ташишни қийинлаштирган. Шу муносабат билан, Берлин аҳолиси овоз бериш учун узун навбатда туришга мажбур бўлган.
Маҳаллий вақт билан соат 18:00 да ёпилиши керак бўлган бўлимлар мавжуд вазиятни ҳисобга олган ҳолда, ўз ишини давом эттирган. Таъкидланишича, Шарлоттенбург-Вильмерсдорф ва Фридрихсайн ҳудудлари тартибсизликлардан энг кўп зарар кўрган.
Сайловлар жараёнидаги муваффақиятсизликка бир вақтнинг ўзида бир нечта сайловларнинг ўтказилиши, коронавирус чекловлари, шунингдек, бюллетенларнинг етишмаслиги сабаб бўлган деб ҳисобланмоқда. Чунки, федерал парламент сайловидан ташқари, пойтахт сайловчилари Берлин шаҳрининг янги парламентини сайлаш учун сайлов участкаларига келган. Шунингдек, шаҳарда алоҳида муниципал сайловлар ва уй-жой мулкдорлари тўғрисида референдум ўтказилган.
Сайловлардаги ҳолат бўйича ҳукумат олиб борган дастлабки текширув Берлиндаги 2257 та сайлов марказидан 100 га яқинида муаммоларни аниқлади. Тартибсизликлар юзасидан тўла тергов натижалари келаси ҳафта эълон қилиниши кутилмоқда.
Изоҳ (0)