Россиянинг USM Telecom («ЮэСэМ Телеком») ва МегаФон алоқа компанияси ўзбекистонлик шериклари билан биргаликда 29 сентябрь куни Digital Holding қўшма корхонасини тузиш босқичини якунлади. Бу ҳақда «Дарё»га Ucell матбуот хизмати хабар берди.
Ўзбекистон давлат активларини бошқариш агентлигида 30 сентябрь куни қўшма корхона ташкил этиш тўғрисидаги якуний ҳужжатлар тўплами имзоланди. Digital Holding компаниясига илгари Ucell бош директори бўлган Владимир Кравченко раҳбарлик қилади.
Digital Holding фаолияти Ўзбекистонда телекоммуникация хизматларидан фойдаланиш имкониятларини кенгайтириш ва сифатини яхшилашга, хусусан халқаро стандартларга мос рақамли инфратузилмани шакллантиришга йўналтирилади.
Шунингдек, компания маълумотларини сақлаш ва қайта ишлаш, рақамли маркировка ва алоҳида турдаги товарлар ҳаракатини назорат қилишда илғор технологиялар ва тизимларини жорий этишни мақсад қилган.
Қўшма корхона таркиби Ucell алоқа операторининг 100 фоиз устав капитали, USM шўъба корхоналари — CRPT Turon ва ICS Holding Uzbekistan’ни ўз ичига олади. Шунингдек, Россия томони Digital Ҳолдинг компаниясини ривожлантириш учун 100 миллион доллар сармоя киритади. Қўшма корхонанинг 51 фоиз улуши МегаФон ва USM Telecom қўшма корхонаси «Диджитал Инвест»га, 49 фоизи эса Ўзбекистон Давлат активларини бошқариш агентлигига тегишли бўлади.
«Digital Holding қўшма корхонасининг яратилиши МегаФон ОАЖ сингари кучли ўйинчининг бозорга келиши илғор технологик ечимлар жорий этилишига хизмат қилади. Мамлакат раҳбарияти томонидан соҳа олдига иқтисодиёт тармоқлари рақамли трансформацияси, хусусан мобил алоқани келгусида ривожлантириш бўйича катта вазифалар қўйилган. Рақамли иқтисодиёт иқтисодий ўсишнинг асосий бошқарувчи кучи сифатида белгиланган. Шунинг учун мобил алоқа ва интернет хизматлари сифатини ошириш, электрон тижорат тизимлари, рақамли хизматлар ва дастурий маҳсулотларни ривожлантиришни жадаллаштириш кўзда тутилмоқда», — дейди Ўзбекистон бош вазири маслаҳатчиси Олимжон Умаров.
«МегаФондан биз ўзбекистонлик ҳамкасбларимизга ўз тажрибамиз, технологияларимиз ва муваффақиятли кейсимиздан тўлиқ фойдаланиш имкониятини тақдим этамиз», — деб таъкидлаган МегаФон бош директори Хачатур Помбухчан.
Россиянинг МегаФон ва USM Telecom алоқа компанияси Ўзбекистон бозорига кираётгани ҳақида 2021 йилнинг февралида маълум қилинганди. Россия томони Digital Holding ривожланиши учун 100 миллион доллар инвестиция киритади.
Ucell — GSM, UMTS, LTE ва 5G стандартларидаги уяли алоқа оператори бўлиб, Ўзбекистон уяли алоқа бозорида етакчи саналади. Компаниянинг хизматларидан 8 миллион абонент фойдаланади. 2021 йил 1 август ҳолатига кўра, аҳоли пунктларида қамров 97,8 фоиз (GSM); 73,2 фоиз (UMTS); 73,4 фоиз (LTE). Ucell — 5G стандартини Ўзбекистонда илк бор синаб кўрган компания.
USM Telecom — USM холдинг компаниясининг рақамли бўлинмаси. МегаФон телекоммуникация оператори ва “ИКС Ҳолдинг” IТ гуруҳини 100 фоиз назорат қилади. «ЮэСэМ Телеком»нинг асосий эгалари USM (акцияларнинг 80 фоиз), Иван Стрешинский (10 фоиз) ва Антон Черепенников (10 фоиз).
МегаФон — бутун Россия рақамли имкониятлар оператори ва Ookla халқаро компаниясининг Россиядаги мобил Интернетнинг энг юқори тезлиги учун бериладиган мукофоти беш карра соҳиби. Компания IТ ва телекоммуникация соҳаларини бирлаштиради, мобил ва стационар алоқа, Интернетга мобил ва кенг полосали уланиш, рақамли телевидение ва ОТТ видео контенти, инновацион рақамли маҳсулотлар ва сервислар учун хизматлар кўрсатади. Компаниянинг Россиядаги хизматларидан 72 миллион мижоз фойдаланади.
Илғор технологияларни ривожлантириш маркази (ИТРМ) — рақамли иқтисодиётда кенг кўламли лойиҳаларни амалга ошириш учун яратилган. ИТРМ USM (50 фоиз), “Ростех” (25 фоиз) ва “Элвис-Плюс групп” (25 фоиз) қўшма лойиҳаси саналади. ИТРМ Россияда товарларни рақамли маркировкалаш ва кузатиб бориш учун давлат ахборот тизимини яратади. Давлат-хусусий шериклик форматида яратилган CRPT Turon тажрибалар натижасига кўра, Ўзбекистонда маркировка тизимининг оператори сифатида белгиланган.
Изоҳ (0)