Ўзбекистонда ZF-UZ-VAC2001 вакцинасининг дастлабки партияси ишлаб чиқарилди

30 сентябрь куни Jurabek Laboratories МЧЖ қўшма корхонаси томонидан ишлаб чиқарилган ўзбек-хитой вакцинасининг 1 458 820 дозаси Ўзбекистон Санитария-эпидемиологик осойишталик ва жамоат саломатлиги хизмати вакилларига топширилди. Бу ҳақда Фармацевтика тармоғини ривожлантириш агентлиги хабар берди.

Маълум қилинишича, ҳозирги кунда корхона томонидан жами 7 миллион доза вакцина ишлаб чиқарилган. Уларнинг кейинги дозалари босқичма-босқич эмлаш пунктларига етказиб берилади.

Маълумот учун, Jurabek Laboratories томонидан мазкур вакцинани ишлаб чиқариш Хитойнинг Anhui Zhifei Longcom Biopharmaceutical Cо. Ltd. компанияси билан имзоланган ҳамкорлик шартномаси доирасида амалга оширилмоқда.

Бундан аввал Ўзбекистонда биринчи босқичда 2 миллион доза «Спутник V» ва 10 миллион доза ўзбек-хитой вакцинаси ишлаб чиқарилиши ҳамда Ўзбекистонда «Спутник V» вакцинасининг биринчи партияси ишлаб чиқарилгани ҳақида хабар берилганди.

Маълумот учун, ZF-UZ-VAC2001 вакцинаси Хитой Фанлар академияси Микробиология институти ҳамда Ўзбекистон Инновацион ривожланиш вазирлиги ҳузуридаги Илғор технологиялар маркази ва ССВ Вирусология илмий-тадқиқот институти билан ҳамкорликда Zhifei Longcom Biopharmaceutical компанияси томонидан яратилган. Мазкур вакцина III фаза клиник синовлари натижаларига кўра, 3-дозадан сўнг вакцинанинг самарадорлиги барча штаммлар учун умумий 81,76 фоиз, «британча» штаммга қарши эса 92,93 фоизни ташкил этган.