Россия Бош прокуратураси Ўзбекистон ҳудудида жиноят содир этган фуқароларни жиноий жавобгарликка тортиш учун Ўзбекистоннинг ваколатли органларига топширди. Бу ҳақда идора матбуот хизматига таяниб, «Gazeta.uz» хабар берди.
Маълум қилинишича, Ж.Б. хавфли рецидивист ҳисобланиб, Самарқанд вилояти Қўшрабод тумани Болалар ва ўсмирлар спорт мактабида бухгалтер бўлиб ишлаган. У собиқ мактаб директори ва бошқа шахслар билан биргаликда 2018 йил декабридан 2019 йил декабрига қадар муассаса ходимларининг имзосини қалбакилаштириш орқали иш ҳақи баёнотларига ёлғон маълумотлар киритган. Шундай қилиб, у ишониб топширилган пул маблағларини ўғирлаганликда айбланмоқда.
Фуқаро Қ.Ж. 2018 йил 7 ноябрдан 2019 йил 4 мартгача Тошкент шаҳрида омбор мудири бўлиб ишлаётганда хом ашё, материаллар ва тайёр маҳсулотни катта миқдорда ўғирлаб кетганликда айбланмоқда.
Россия Бош прокуратураси, шунингдек, Ўзбекистон Бош прокуратурасининг уюшган жиноий гуруҳ таркибида ўғриликда айбланаётган Ж.М. ва қасддан баданга ўртача оғирликдаги шикаст етказишда айбланган Ф.И.ни экстрадиция қилиш ҳақидаги сўровларини қондирган.
Тўрт эркак Россияда турли вақтларда ҳибсга олинган. Ўзбекистон Бош прокуратураси уларни экстрадиция қилиш учун сўровлар тайёрлаган.
Россия Бош прокуратурасининг уларни экстрадиция қилиш тўғрисидаги қарорлари қонуний кучга кирган, Россия Федерал жазони ижро этиш хизматига уларни зарур хавфсизлик чораларини кўрган ҳолда топшириш вазифаси қўйилган. Улар махсус кузатувчилар ҳамроҳлигида Ўзбекистонга етказилади.
Эслатиб ўтамиз, 2020 йилнинг декабрида Россия жиноий жавобгарликка тортиш учун бир йўла 56 Ўзбекистон фуқаросини мамлакатга топширган эди.
Мавзуга доир: Ўзбекистонда қидирувда бўлган шахс Россияда қўлга олинди
Изоҳ (0)