Россиялик мухолифатчи Навальнийнинг заҳарланиши ҳақидаги суриштирув Американинг «Эмми» мукофотига сазовор бўлди

Россиялик мухолифатчи Алексей Навальнийга қилинган суиқасд юзасидан бир қанча оммавий ахборот воситалари журналистларининг биргаликда олиб борган суриштируви «Янгиликлар дастуридаги суриштирув-репортаж» номинацияси бўйича Америка телевидениесининг «Эмми» мукофотига сазовор бўлди. Бу ҳақда Meduza хабар берди.

Мукофот CNN телеканалида 2020 йилнинг декабрь ойида намойиш этилган суриштирув натижалари тўғрисидаги ҳисоботга берилди. CNN билан бирга суриштирувни Insider, Bellingcat ва Der Spiegel агентликлари олиб борган.

Суриштирув иштирокчиларининг якуний хулосасига кўра, 2020 йилнинг август ойида Навальний «Новичок» гуруҳига кирувчи модда билан Федерал хавфсизлик хизмати (ФХХ) махсус гуруҳи ходимлари томонидан заҳарланган, уларнинг ортида эса ФХХ суд экспертизаси институти турган. Заҳарлашда иштирок этган кишиларнинг шахси мобил телефонларнинг ҳисоб маълумотларини офлайн маълумотлар базаси билан солиштириш натижасида аниқланди.

CNN маълумотларига кўра, суиқасдни амалга оширишга 8 киши алоқадор. Бу одамлар одатда ҳақиқий исми ва лақабларини ўзгартирган ҳолда икки ёки уч кишидан иборат гуруҳларга бўлиниб ҳаракатланган. Улар ҳар сафар Навальний борган шаҳарга борган, деб ёзади газета.

ФХХ Навальнийнинг заҳарланишига алоқадорлигини рад этган ва бундай айбловларни «ФХХ ва унинг ходимларини обрўсизлантириш мақсадида олдиндан режалаштирилган провокация» деб атаган.

Россия президенти Владимир Путин суриштирувни «Америка махсус хизматларининг материалларини қонунийлаштириш» деб баҳолади. Унинг сўзларига кўра, бу Россиянинг юқори мартабали амалдорларига ҳужум қилишга уриниш ва «сиёсий уруш ҳийласи».

2020 йил 20 август куни Москвага учаётган йўловчи самолётида Навальнийнинг соғлиғи ёмонлашган. Лайнер зудлик билан Омскка қўндирилиб, мухолифатчи касалхонага ётқизилди. Икки кундан кейин уни Германиянинг «Шарите» касалхонасига олиб кетишди. Мухолифатчининг шериклари уни заҳарлашганини даъво қилди.

Октябрь ойи бошида Германия ҳукумати Навальнийнинг организмидан «Новичок» гуруҳига кирувчи жанговар заҳар излари топилгани ҳақида хабар берди. Кейинчалик буни Франция ва Швеция лабораториялари тасдиқлади. Омск шифокорлари заҳарланиш изларини топмади.

Россия ҳукумати Навальнийнинг заҳарланишига алоқадорлиги бўйича айбловни бир неча бор рад этган. 2020 йил ноябрь ойида Россия Ташқи ишлар вазири Сергей Лавров мухолифатчи Германияда ёки Россиядан у ерга кетаётган самолётда жанговар заҳарловчи модда кимёвий дозасини олган бўлиши мумкинлигини айтди. Россиянинг юқори раҳбарияти, шу жумладан шахсан Путин, Германия ҳукуматини Россиянинг талабига биноан Навальнийнинг таҳлиллари натижалари ва унинг заҳарланиш сабаблари ҳақидаги эксперт хулосаларини бермагани учун бир неча бор танбеҳ берди.