Британия ҳукумати ёнилғи инқирозини бартараф этиш учун ҳарбийларни сафарбар қилди

Британия ҳукумати ёнилғи инқирозини ҳал қилиш бўйича ҳаракатлар доирасида армияни юқори шай ҳолатга келтирди. Бу ҳақда Бизнес, энергетика ва саноат вазирлиги матбуот хизмати хабарига таяниб, «РБК» хабар берди.

«Британия цистернали автомобиллар ҳарбий ҳайдовчилари ёнилғини керакли жойга етказиб бериш ва ёнилғи захиралари юқори даражада қолишини қўшимча кафолатлаш учун сафарбар қилинади», — дейилади хабарда.

Қайд этилишича, эндиликда ҳарбий ҳайдовчилар хизмат сафарига юборилишидан олдин махсус тайёргарликдан ўтади, бу эса уларга «таъминот занжиридаги қийин вазиятлар»ни енгишга имкон беради.

Шунингдек, хабарда Қироллик мудофаа вазири Бен Уоллеснинг сўзлари келтирилган: «Бизнинг Қуролли кучларимиз таркибидаги эркак ва аёллар транспорт босими энг кўп сезиладиган жойда уни камайтириш учун ёрдамга тайёр. Шунинг учун мен ҳарбийларнинг юқори шайлигига рухсат бердим», — деб тушунтирган у.

Июль ойи охирида Британия автоташувчилар ассоциацияси мамлакатда 100 минг юк машина ҳайдовчиси етишмаётгани ҳақида огоҳлантирганди. Бунга сабаб ҳайдовчиларнинг кўпчилиги Brexit’дан кейин Буюк Британияни тарк этган, минглаб янги ҳайдовчилар эса COVID-19 пандемияси пайтида локдаун туфайли мураккаблашган ҳайдовчилик гувоҳномаси тестини кутган. Натижада мамлакатда бир неча ой давомида ёнилғи етказиб беришда узилишлар кузатилмоқда, бу эса дўконларга озиқ-овқат етказиб беришга таъсир қилади.

Шунингдек, нефть компаниялари баъзи ёнилғи қуйиш шохобчаларини ёпишга мажбур бўлди. Ушбу фонда британияликлар ҳукуматнинг ёнилғи етказиб беришда муаммо йўқлиги ҳақидаги баёнотларига қарамай, ваҳима ичида бензин сотиб ола бошлади. Британиянинг 11 йирик ёнилғи компаниялари, жумладан, Shell, BP va Exxon Mobil қўшма баёнотида яқин кунларда Қиролликда ёнилғига талаб нормал даражага қайтишини ваъда қилган.

25 сентябрь куни Буюк Британия ҳукумати мамлакатда ишчи кучи танқислиги муаммосини ҳал қилиш бўйича чора-тадбирлар пакетини қабул қилди, булар, жумладан, юк машиналари ҳайдовчилари учун 5 мингта қисқа муддатли виза беришни назарда тутади. Бизнес, энергетика ва саноат вазирлигининг маълум қилишича, юк машиналари ҳайдовчилари лицензиялари муддатини узайтириш учун қайта имтиҳон топширишдан вақтинча озод қилинади, чунки бу жараён ҳам уч кун вақт олади. 27 сентябрдан 31 декабргача бўлган вақт оралиғида тугайдиган ҳайдовчилик гувоҳномаларининг муддати 2022 йилнинг 31 январигача узайтирилади.