Россияда COVID-ўлимлар бўйича рекорд такрорланди, Бразилия президенти яккаланиш режимига ўтди. Коронахабарлар

Жонс Ҳопкинс университети маълумотларига кўра, дунёда коронавирусга чалинганлар сони 230 147 174 кишига етди, шуларнинг 4 720 430 нафари вафот этган. Шунингдек, айни пайтгача жаҳонда 5,996 миллиард доза вакцина қўлланилган.

Касалланганлар сони бўйича АҚШ (42,5 миллион), Ҳиндистон (33,5 миллион), Бразилия (21,2 миллион), Буюк Британия (7,5 миллион) ва Россия (7,2 миллион) етакчилик қилмоқда.

Россияда коронавирусдан кунлик ўлимлар сони бўйича рекорд такрорланди

Ўтган бир кеча-кундузда Россияда 820 киши COVID-19 оқибатида вафот этди. Худди шундай кунлик ўлим кўрсаткичи 26 августда ҳам қайд этилганди. Бу пандемиядан бошидан буён кузатилган энг катта кўрсаткич.

Бир кунда бутун мамлакат бўйлаб 21 438 кишида коронавирус аниқланган. Бу бир кун аввалгидан икки минг нафарга кўп бўлиб, августда қайд этилган касалланиш кўрсаткичларига яқин.

Москвада бир кунда 3445 нафар янги бемор аниқланди, бу июль охиридан буён энг катта кўрсаткич. Шаҳарда, шунингдек, касалхонага ётқизилган беморлар ва сунъий нафас олдириш аппаратига уланганлар сони ошмоқда.

Бразилия президенти яккаланиш режимига ўтди

Бразилия президенти Жаир Болсонару Нью-Йоркдаги БМТ Бош ассамблеясидан мамлакатга қайтиб келгач, яккаланиш режимига ўтди, чунки унга ҳамроҳлик қилган соғлиқни сақлаш вазири Марсело Кейрогида коронавирус аниқланди.

Болсонару ўз уйида қолган ва 24 сентябрга режалаштирилган сафарини бекор қилган.

Бразилия санитария бошқармаси Anvisa БМТ Бош ассамблеясига бориб келган президент делегацияси аъзоларининг барчаси 14 кун давомида изоляцияда бўлиб, коронавирусга қўшимча тестлар топширишини тавсия қилди.

Дельта коронавируснинг бошқа штаммларини деярли сиқиб чиқарди

Дастлаб Ҳиндистонда аниқланган дельта штамми бутун дунёдаги беморлардан олинган намуналарнинг 99 фоизида аниқланган. Бу ҳақда Жаҳон соғлиқни сақлаш ташкилоти (ЖССТ)нинг COVID-19 бўйича етакчи мутахассиси Мария ван Керкхове маълум қилди.

Унинг сўзларига кўра, инфекциянинг бошқа хавф солаётган вариантлари — алфа, бета ва гаммага касалланганларнинг бир фоизи тўғри келмоқда.

«Дельта кучлироқ ва янада юқумлироқ бўлди, у аҳоли орасида тарқалаётган бошқа штаммлар ва вирусларнинг ўрнини эгаллаб олмоқда», — деди эксперт.

Сўнгги маълумотларга кўра, дельта штамми дунёнинг 185 та давлати ва ҳудудларида қайд этилган.

Бундан ташқари, ЖССТ коронавируснинг қизиқиш уйғотаётган яна бешта штаммини айтиб ўтди. Улар орасида ёта, эта ва каппа ҳам бор. ЖССТ уларнинг статусини «хавф солаётган штаммлар»дан «кузатилаётган штаммлар»га ўзгартирди.

Хитойлик олимлар АҚШда 2019 йил кузидаги коронавирус билан касалланиш ҳолатлари ҳақида маълум қилди

Хитой олимлари ўтказган тадқиқот натижалари шуни кўрсатдики, COVID-19 тарқалиши АҚШда 2019 йил сентябридаёқ — Хитойдагидан аввалроқ бошланган бўлиши мумкин.

Экспертлар математик моделлаштириш ёрдамида тасдиқланган касалланиш ҳолатлари сони ҳақидаги маълумотлардан фойдаланиб, АҚШ ва Хитой ҳудудида коронавирус тарқалиши бошланган эҳтимолий санани таҳлил қилди.

Натижада 50 фоиз эҳтимол билан Америкада илк касалланиш ҳолати 2019 йил августидан октябригача бўлган даврда юз бергани аниқланди. Бу АҚШда биринчи тасдиқланган ҳолатнинг расман эълон қилинган санаси — 2020 йил 20 январдан аввалроқдир.

Олимларнинг таъкидлашича, таҳлил натижалари COVID-19 катта эҳтимол билан АҚШда 2019 йил сентябрида тарқалишни бошлаганини кўрсатмоқда, Хитойнинг ўзида эса уларнинг сўзларига кўра, касаллик авж олиши ўша йил декабри охиридагина қайд этилган.