Россиянинг Хабаровск ўлкасида ғойиб бўлган самолёт бўлаклари қўриқхонадан топилди. Экипаж аъзоларининг ҳаммаси ҳалок бўлган

Россиянинг Хабаровск ўлкасида 22 сентябрь куни ғойиб бўлган Ан-26 самолётининг бўлаклари Корфовский қишлоғи яқинидаги тоғ этагида жойлашган Болшехехцирский қўриқхонасидан топилди.

«2021 йил 23 сентябрь куни маҳаллий вақт билан 12:00 да Болшехехцирский давлат қўриқхонаси тизмасининг тепасида қидирув ишлари олиб борилаётган вақтда, ҳалокатга учрагани тахмин қилинаётган Ан-26 самолётининг бўлаклари топилди»,— дейилади Россия Тергов қўмитаси веб-сайтида.

Ҳалокат жойи Фавқулодда вазиятлар вазирлигининг вертолёти ёрдамида олиб борилаётган қидирувда аниқланган. Самолёт ноқулай жойга қулаб тушгани сабабли қутқарувчилар у ерга қийинчилик билан етиб борган.

Ҳалокат жойига етиб келган қутқарувчилар экипаж аъзоларининг бирортасини тирик ҳолда топмади — уларнинг ҳаммаси ҳалок бўлган. Ушбу маълумотни қидирув операцияси жойида бўлган «Интерфакс» манбаси тасдиқлади.

«Москва вақти билан 10:55 да биринчи қидирув гуруҳи Ан-26 ҳалокатга учраган жойга етиб борди. Экипажнинг барча аъзолари ҳалок бўлган, уларнинг жасади топилди», — дея хабар қилди «РИА Новости» суҳбатдоши.

Ан-26 самолёти 22 сентябрь куни кечқурун радарлардан ғойиб бўлди ва Хабаровскдан 40 километр узоқликда у билан алоқа узилди. «Парвоз текширувлари ва тизимлари» компаниясига тегишли самолёт Хабаровск ўлкасида алоқа воситалари ва радиолокация ускуналарини текшириш билан шуғулланаётган эди. Самолёт бортида олти киши бўлган.

Ҳалокатнинг дастлабки сабаблари ёмон об-ҳаво шароити ёки учувчиларнинг хатоси деб баҳоланмоқда. Тергов қўмитаси ҳодиса юзасидан жиноий иш очди.

12 сентябрь куни Россиянинг Иркуцк вилоятида самолёт қулаб тушиб, 4 киши ҳалок бўлганди. Ундан бир ой аввал, 12 август куни эса Камчатка ўлкасида сайёҳларни олиб кетаётган Ми-8 вертолёти кўлга қулаб тушган. Ми-8 бортида 16 киши бўлган, улардан 8 нафари бедарак йўқолган.

Шунингдек, 6 июль куни Россиянинг Петропавловск-Камчатский шаҳридан Палана посёлкасига йўловчи парвозини амалга ошираётган Ан-26 самолёти денгизга қулаган эди. Самолёт бортида 28 киши бўлган. Ҳалокатдан сўнг Россияда уч кунлик мотам эълон қилинганди. Дастлаб қутқарувчилар самолёт қулаб тушиши оқибатида ҳалок бўлган олти кишининг жасадини топишга муваффақ бўлган, улар сувдан чиқариб олинган. 9 июль куни Ан-26 самолётидаги барча йўловчилар ва экипаж аъзоларининг жасади топилган.