Jons Hopkins universiteti ma’lumotlariga ko‘ra, dunyoda koronavirusga chalinganlar soni 230 147 174 kishiga yetdi, shularning 4 720 430 nafari vafot etgan. Shuningdek, ayni paytgacha jahonda 5,996 milliard doza vaksina qo‘llanilgan.
Kasallanganlar soni bo‘yicha AQSh (42,5 million), Hindiston (33,5 million), Braziliya (21,2 million), Buyuk Britaniya (7,5 million) va Rossiya (7,2 million) yetakchilik qilmoqda.
Rossiyada koronavirusdan kunlik o‘limlar soni bo‘yicha rekord takrorlandi
O‘tgan bir kecha-kunduzda Rossiyada 820 kishi COVID-19 oqibatida vafot etdi. Xuddi shunday kunlik o‘lim ko‘rsatkichi 26-avgustda ham qayd etilgandi. Bu pandemiyadan boshidan buyon kuzatilgan eng katta ko‘rsatkich.Bir kunda butun mamlakat bo‘ylab 21 438 kishida koronavirus aniqlangan. Bu bir kun avvalgidan ikki ming nafarga ko‘p bo‘lib, avgustda qayd etilgan kasallanish ko‘rsatkichlariga yaqin.
Moskvada bir kunda 3445 nafar yangi bemor aniqlandi, bu iyul oxiridan buyon eng katta ko‘rsatkich. Shaharda, shuningdek, kasalxonaga yotqizilgan bemorlar va sun’iy nafas oldirish apparatiga ulanganlar soni oshmoqda.
Braziliya prezidenti yakkalanish rejimiga o‘tdi
Braziliya prezidenti Jair Bolsonaru Nyu-Yorkdagi BMT Bosh assambleyasidan mamlakatga qaytib kelgach, yakkalanish rejimiga o‘tdi, chunki unga hamrohlik qilgan sog‘liqni saqlash vaziri Marselo Keyrogida koronavirus aniqlandi.Bolsonaru o‘z uyida qolgan va 24-sentabrga rejalashtirilgan safarini bekor qilgan.
Braziliya sanitariya boshqarmasi Anvisa BMT Bosh assambleyasiga borib kelgan prezident delegatsiyasi a’zolarining barchasi 14 kun davomida izolyatsiyada bo‘lib, koronavirusga qo‘shimcha testlar topshirishini tavsiya qildi.
Mavzuga doir: Braziliya prezidenti emlanganlik sertifikati yo‘qligi uchun Nyu-York restoranlariga kiritilmadi
Delta koronavirusning boshqa shtammlarini deyarli siqib chiqardi
Dastlab Hindistonda aniqlangan delta shtammi butun dunyodagi bemorlardan olingan namunalarning 99 foizida aniqlangan. Bu haqda Jahon sog‘liqni saqlash tashkiloti (JSST)ning COVID-19 bo‘yicha yetakchi mutaxassisi Mariya van Kerkxove ma’lum qildi.Uning so‘zlariga ko‘ra, infeksiyaning boshqa xavf solayotgan variantlari — alfa, beta va gammaga kasallanganlarning bir foizi to‘g‘ri kelmoqda.
“Delta kuchliroq va yanada yuqumliroq bo‘ldi, u aholi orasida tarqalayotgan boshqa shtammlar va viruslarning o‘rnini egallab olmoqda”, — dedi ekspert.
So‘nggi ma’lumotlarga ko‘ra, delta shtammi dunyoning 185 ta davlati va hududlarida qayd etilgan.
Bundan tashqari, JSST koronavirusning qiziqish uyg‘otayotgan yana beshta shtammini aytib o‘tdi. Ular orasida yota, eta va kappa ham bor. JSST ularning statusini “xavf solayotgan shtammlar”dan “kuzatilayotgan shtammlar”ga o‘zgartirdi.
Mavzuga doir: JSST koronavirusning yangi “kolumbiyacha” shtammiga “myu” deb nom berdi va qiziqish uyg‘otgan variantlar ro‘yxatiga kiritdi
Xitoylik olimlar AQShda 2019-yil kuzidagi koronavirus bilan kasallanish holatlari haqida ma’lum qildi
Xitoy olimlari o‘tkazgan tadqiqot natijalari shuni ko‘rsatdiki, COVID-19 tarqalishi AQShda 2019-yil sentabridayoq — Xitoydagidan avvalroq boshlangan bo‘lishi mumkin.Ekspertlar matematik modellashtirish yordamida tasdiqlangan kasallanish holatlari soni haqidagi ma’lumotlardan foydalanib, AQSh va Xitoy hududida koronavirus tarqalishi boshlangan ehtimoliy sanani tahlil qildi.
Natijada 50 foiz ehtimol bilan Amerikada ilk kasallanish holati 2019-yil avgustidan oktabrigacha bo‘lgan davrda yuz bergani aniqlandi. Bu AQShda birinchi tasdiqlangan holatning rasman e’lon qilingan sanasi — 2020-yil 20-yanvardan avvalroqdir.
Olimlarning ta’kidlashicha, tahlil natijalari COVID-19 katta ehtimol bilan AQShda 2019-yil sentabrida tarqalishni boshlaganini ko‘rsatmoqda, Xitoyning o‘zida esa ularning so‘zlariga ko‘ra, kasallik avj olishi o‘sha yil dekabri oxiridagina qayd etilgan.
Izoh (0)