Туркманистон фуқаролари ЖССТга мурожаат қилиб, ҳукуматга коронавирусни тан олдиришни сўради

Туркманистон фуқаролик жамияти Жаҳон соғлиқни сақлаш ташкилотига мактуб йўллаб, ундан Туркманистон ҳукуматини COVID-19 ни тан олишга мажбур қилишни сўради, деб ёзмоқда Asia-Plus.

Мактуб муаллифларининг таъкидлашича, Туркманистон ҳукумати «ҳалигача мамлакатда COVID-19 мавжудлигини инкор этиб, аҳолининг касалланиш ва ўлим даражасини яширмоқда». Уларнинг сўзларига кўра, мамлакатдаги шифохоналарда одам гавжум, аксарият аҳолининг касалхонада даволанишга пули йўқ.

«Биз COVID-19 нинг барча аломатларига эга, шунингдек, коронавирусдан вафот этгани тахмин қилинаётган ўнлаб одамларнинг исмларини биламиз. Ишончимиз комилки, COVID-19 дан ўлим ҳолатлари жуда кўп, лекин марҳумларнинг қариндошлари ва соғлиқни сақлаш ходимлари маълумот билан бўлишишдан қўрқиши туфайли коронавирусни ўлим сабаби сифатида тасдиқлашнинг иложи йўқ», — дейилади ЖССТга йўлланган мурожаатда.

Мактуб муаллифларининг ишонч билан қайд этишича, «Туркманистон ҳукумати томонидан COVID-19 пандемиясининг рад этилиши, мамлакатда амалда бўлган ахборотни олиш ва тарқатиш эркинлигини тақиқлаб, фуқароларнинг яқинлашиб келаётган хавфдан хабар топмаслигини олдиндан белгилаб қўйган».

Шу муносабат билан улар ЖССТдан ҳукуматни беморларнинг биологик материалларини текшириш ҳақидаги ваъдасини бажаришга мажбурлашни сўради ва бу «Туркманистоннинг ўз ҳудудида COVID-19 пандемияси борлигини тан олиш йўлида муҳим қадам» бўлишини билдирди.

Azatlyk Radiosy мухбирларига кўра, Ашхободдаги касалхоналар одам билан тўлиб кетган, коронавирус аломатларига эга аҳолининг кўпчилиги касалхонага ётқизилмаган. Таҳририят олган фотосуратларда Ашхободдаги касалхона ҳудудида юзлаб одамлар тўпланганини кўриш мумкин.

Шунингдек, охирги бир ой мобайнида мамлакатнинг турли вилоятларида бутун бир аҳоли пунктлари изоляцияга олингани ҳақида хабар қилинган. Ҳозирги вақтда Тошҳовуз вилоятининг Ниёзов этрапи яккаланиш режимида.

Туркманистон ҳукумати мамлакатда коронавирус йўқлигини таъкидлашда давом этмоқда. Ўз навбатида, мустақил ОАВ мамлакатда COVID-19 узоқ вақтдан бери мавжудлигини ва ундан кўп одамлар вафот этганини ёзмоқда.

Шу билан бирга, Туркманистонда қатъий чекловлар амал қилмоқда, одамлар ниқоб тақишга мажбурланмоқда. Расмийлар буни Орол денгизидан тарқалаётган «зарарли чанг» хавфи билан изоҳламоқда. Туркманистонда коронавирусга тест ўтказилади, лекин COVID-19 борлигини билдирувчи ижобий натижа ҳақидаги маълумотнома бемор қўлига берилмайди.