Президент матбуот хизматининг маълум қилишича, давлат раҳбари Қорақалпоғистонга ташрифини якунлаб, Амударёда қурилаётган кўприкни кўздан кечирган.
Лойиҳанинг қиймати 174 миллион доллар бўлиб, унинг эвазига 80 километрлик темир йўл ва Амударё устида 413 метр узунликдаги кўприк барпо этилади. Президент қурилиш ишларининг боришини кўздан кечирган.
«Бу одамлар узоқ йиллар кутган лойиҳа. Энди янада кўп йиллар халқимизга хизмат қилиши керак. Шунинг учун биринчи ўринда сифат. Ажратилган маблағ кичкина эмас. Тажрибали мутахассисларни жалб этиб, ҳар бир жиҳатни ўйлаб, элимга, юртимга деб қуриш керак», — дейди Шавкат Мирзиёев.
Эслатиб ўтамиз, 2020 йилнинг декабрида Амударё устида Хоразмни Қорақалпоғистон билан боғлайдиган кўприк қурилиши маълум бўлганди. «Ўзбекистон темир йўллари» акциядорлик жамияти раиси Ҳусниддин Ҳосиловнинг сўзларига кўра, Амударё устида қуриладиган 413 метрлик кўприкда автомобиль ва темир йўл биргаликда ўтади. Унинг таъкидлашича, янги кўприк йўлни 240 километрга, ташилаётган юкларнинг манзилга етиб бориш вақтини 6 соатга қисқартиради. Бундан ташқари, ушбу кўприк орқали ўтаётган юкларнинг йиллик самараси 150 миллиард сўмга яқин бўлиши кутилмоқда.
«Ўзбекистон темир йўллари» раҳбари ўшанда Президент ушбу қурилишни январь ойидан бошлаш ҳақида топшириқ бергани ва бунинг учун зарур бўлган маблағни ҳам ажратганини маълум қилганди.
Изоҳ (0)