Қашқадарё вилояти Қарши шаҳрида жамиятда юриш-туриш қоидаларини менсимасдан ўзаро жанжал қилган шахсларни тартибга чақирган ИИБ ходимларига қаршилик кўрсатганларга жиноят иши қўзғатилди. Бу ҳақда вилояти ИИБ ахборот хизмати хабар берди.
Маълум қилинишича, шаҳарнинг Ислом Каримов кўчасида жойлашган «Дори-дармон» МЧЖга қарашли дорихона рўпарасида 20 сентябрь куни соат тахминан 22:20 лар «Шўртан» МФЙда яшовчи фуқаро ўзининг олдиндан таниши бўлган икки шахс билан бир-бирини ҳақоратлаб, бақириб, ён-атрофдаги фуқаролар тинчини бузган. Улар жамиятда юриш-туриш қоидаларини қасддан менсимасдан ўзаро жанжал қилаётган вақтда вилоят ИИБ ППХ ходимлари жамоат тартибини сақлаш ҳамда олдини олиш мақсадида фуқаролар олдига борган.
Жанжал қилаётган фуқаролар ИИБ ППХ ходимларини қонуний талабига бўйсунмасдан, ички ишлар органлари ходимлари хизмат кийимини йиртиб, қўлини тишлаб фаол қаршилик кўрсатган.
Мазкур ҳолат юзасидан 21 сентябрда Жиноят кодексининг 219-моддаси (ҳокимият вакилига ёки фуқаровий бурчини бажараётган шахсга қаршилик кўрсатиш) 2-қисми ва 277-моддаси (безорилик) 3-қисми «г» банди билан жиноят иши қўзғатилиб, учала шахс ҳам гумон қилинувчи тариқасида жалб қилинди. Жиноят-процессуал кодексининг 221-моддаси тартибда ушланган.
Жиноят иши бўйича дастлабки тергов ҳаракатлари Қарши шаҳар прокуратураси томонидан олиб борилмоқда.
Аввалроқ Тошкентда ЙПХ ходимларига фаол қаршилик кўрсатган эркакка нисбатан жиноят иши очилгани, Фарғонада маст эркак ИИБ ходимини болта билан уриб, жароҳат етказгани, Тошкентда фуқаро ички ишлар ходимига «калла қўйгани» тўғрисида хабар берилганди.
Изоҳ (0)