Ўзбекистон мудофаа вазири генерал-лейтенант Баҳодир Қурбонов Буюк Британия ва Шимолий Ирландия бирлашган қироллиги Қуролли кучлари вазири Жеймс Хиппи билан учрашув ўтказди, деб хабар беради вазирлик матбуот хизмати.
«Ўзбекистон 24» телеканали орқали узатилган лавҳада айтилишича, Жеймс Хиппи Афғонистоннинг янги ҳукумати билан боғлиқ вазиятга Ўзбекистон қандай нуқтаи-назар билан қараши Британия томонига жуда муҳимлигини таъкидлаган.
«Афғонистондаги вазият тез суратларда ривожланиб бормоқда. Ташрифим мақсади ҳам шу масалага ойдинлик киритишдир. Чунки сиз қўшни Ўзбекистон вазиятни биздан яхши биласиз. Вазирлик даражасидаги учрашувларда биз Афғонистон томонидан содир этилиши мумкин бўлган хавф-хатарга Ўзбекистоннинг позициясини ўрганмоқдамиз», — дейди у.
Учрашув доирасида Ўзбекистон Мудофаа вазирлиги ҳамда Британия ва Шимолий Ирландия Бирлашган Қироллиги Мудофаа вазирликлари ўртасида 2021−2022 йилга мўлжалланган ҳамкорлик режаси имзоланган.
Британия Қуролли кучлари вазири сўзларига кўра, ушбу келишув Буюк Британия ва Ўзбекистон қўшинлари биргаликда машғулотларни ўтказишлари учун мустаҳкам асос яратади. Шунингдек, Ўзбекистон қуролли кучлари Бирлашган Қироллик ҳарбий базаларида малака ошириши ёки у ерда ўтказиладиган ҳарбий ўйинларда иштирок этишлари мумкин.
«Ўз навбатида Британия томони учун ҳам бу катта имконият. Негаки бизнинг ҳам сизлардан ўрганадиган жиҳатларимиз кўп», — дейди Жеймс Хиппи.
Шунингдек, Буюк Британия делегацияси кун давомида Қуролли кучлар академияси ва «Ғалаба боғи» мажмуаси ҳамда ундаги «Шон-шараф» музейи билан ҳам яқиндан танишган юқори мартабали хорижлик меҳмон Қуролли кучлар академиясида яратилган шарт-шароитларга юксак баҳо берган. Ғалаба боғи мажмуасида эса Зулфия Зокировага ўрнатилган ёдгорлик пойига гулчамбар қўйиб, ҳурмат бажо келтирган.
Изоҳ (0)