Шавкат Мирзиёев 20 сентябрь куни таълим, маданият ва тиббиёт соҳаларидаги бунёдкорлик лойиҳалари тақдимоти билан танишди. Бу ҳақда Президент матбуот хизмати хабар берди.
Давлат раҳбарининг шу йил 23 июндаги қарорига мувофиқ «Янги Ўзбекистон» университетига асос солинган эди. Қарорда университет учун замонавий ўқув кампуси бунёд этилиши белгиланди. Шу мақсадда туркиялик муҳандислар билан биргаликда лойиҳа ишлаб чиқилган. Тадбирда ушбу лойиҳанинг асосий жиҳатлари, бўлажак бинода яратиладиган шароитлар ҳақида маълумот берилди.
Хабарда айтилишича, тақдимотда янги кутубхона лойиҳаси ҳам кўриб чиқилди. У Алишер Навоий номидаги Ўзбекистон Миллий боғи ҳудудида барпо этилади. Кутубхонанинг ташқи кўриниши Ўзбекистондаги қадимий обидаларга уйғун тарзда лойиҳалаштирилган. Улкан китоб фондини сақлаш, мутолаа, маданий ҳордиқ чиқариш, турли тадбирлар ўтказиш билан боғлиқ барча жиҳатлар инобатга олинган.
Шавкат Мирзиёев 2021 йил 14 май куни Республика онкология ва радиология тиббиёт марказига бориб, шароитларни кўздан кечирганди. Ушбу марказ учун янги бино қуриш вазифаси қўйилиб, Тошкент тиббиёт академияси клиникаси ҳудудидан ер ажратилди.
Хорижий тиббиёт муассасаларининг илғор тажрибаси, шифокор ва беморлар учун барча шароитлар ҳисобга олиниб, лойиҳа ишлаб чиқилди.
Янги бино 10 қават бўлиб, биринчи қаватда маслаҳат поликлиникаси ва қабул бўлими жойлашади. Юқори қаватларда 650 стационар ва 100 амбулатор ўринга эга даволаш бўлимлари бўлади. Шунингдек, бу ерда Тошкент тиббиёт академияси, Тошкент врачлар малакасини ошириш институти кафедралари, магистратура, ординатура учун ҳам шароитлар яратилади.
Бинонинг 3 қаватли ерости қисмида радиология ва нур терапия бўлимлари, замонавий компьютер томография, магнит резонанс томография, рақамли рентген ускуналари ва бошқа замонавий диагностика бўлимлари жойлаштирилади.
Президент қурилишларни халқаро стандартлар асосида, сифатли амалга ошириш, биноларга хизмат кўрсатадиган техник ходимларни ҳозирдан тайёрлаб бориш юзасидан кўрсатмалар берди.
Изоҳ (0)