Қашқадарё вилоятининг собиқ ҳокими Озод Пармонов ҳамда амалдаги ҳоким Зоир Мирзаев вилоятнинг Деҳқонобод туманида бўлиб ўтган уч авлод учрашувида иштирок этди, дея хабар берди «Дарё» мухбири.
Қайд этилишича, 18 сентябрь куни Деҳқонобод туманида уч авлод учрашуви бўлиб ўтган. Унда кекса, ўрта ва ёш авлод вакиллари туманда сўнгги беш йилда амалга оширилган ислоҳотлар билан таништирилган.
«Уч авлод учрашувида етти ёшдан саксон, ҳатто саксон беш ёшгача бўлган кекса ёшлилар бир жойга жам қилиниб, ҳокимлик томонидан ташкил этилган автобусларда туманга саёҳат уюштирилди. Жумладан, иштирокчилар туманда сўнгги беш йилда амалга оширилган ишлар билан таништирилди. Дастлаб 2018 йилда қурилган Мотамсаро она ҳайкали пойига гуллар қўйилган бўлса, кейин 2020 йил фойдаланишга топширилган истироҳат боғида сайр қилинди. Сўнгра 600 минг китоб фондига эга кутубхона билан, ундан кейин эса Оқсув—Деҳқонобод лойиҳаси билан таништирилди», — дейди туман ҳокими ўринбосари Баҳодир Омонов.
Таъкидланишича, тадбир сўнгида вилоят ҳокими Зоир Мирзаев, вилоятга 1995—1998 йилларда раҳбарлик қилган Озод Пармонов, Деҳқонобод туманига 1971—1975 йиллар, шунингдек, 1988—1992 йилларда раҳбарлик қилган Январь Иноятовлар иштирокида концерт дастури ташкил этилган.
Уч авлод учрашувида сўз олган туманнинг биринчи раҳбари Январь Иноятов туманга раҳбарлик қилиш икки маротаба насиб этганини, шу сабабдан Деҳқонобод туманига, халқига бўлган меҳри ўзгачалигини таъкидлади.
«Туманга раҳбар бўлиб келганимда ҳеч нарса йўқ эди: нолдан бошлаганмиз. Дастлаб туман марказини қуриш ҳақида бош қотирганмиз ва 1972 йил Қорашина шаҳарчасига асос солганмиз. Айни кунда шаҳарча вилоятдаги энг чиройли шаҳарчалардан бири ҳисобланади. Деҳқонободликлар билан икки маротаба ишлаш насиб этгани учунми, туман аҳлига бўлган меҳрим ўзгача. Ҳар сафар туманга келсам, бошқача ҳисни туяман», — дейди Январь Иноятов.
Изоҳ (0)