Буюк Британия бош вазири Борис Жонсон мамлакат ҳукуматида бир қатор ўзгаришларни амалга оширди, жумладан, ташқи ишлар вазири Доминик Раабни лавозимидан четлади. Бу ҳақда BBC News хабар берди.
Раабнинг ўрнини Элизабет Трасс эгаллади, бунгача у халқаро савдо вазири бўлиб ишларди. Трасс Британия тарихида ташқи ишлар вазири этиб тайинланган иккинчи аёл бўлди.
Шу билан бирга, Рааб бош вазир ўринбосари сифатида, шунингдек, Майкл Гоувнинг ўрнига адлия вазири лавозимини эгаллаб, ҳукуматда қолди. Гоув, ўз навбатида, уй-жой қурилиш вазири бўлди, Роберт Женрик бу лавозимдан четлатилди. Гоув, шунингдек, Буюк Британиядаги сайловлар ва муносабатлар учун вазирлик мажбуриятини сақлаб қолади.
Бундан ташқари, Жонсон Гевин Уильямсонни таълим вазири лавозимидан озод қилди. Унинг ўрнига Надим Захави тайинланди.
Доминик Рааб Буюк Британия ташқи ишлар вазирлигини 2019 йил июлдан буён бошқариб келаётган эди. Сўнгги ҳафталарда Рааб Афғонистонда «Толибон» ҳужумлари кетаётган пайтдаги хатти-ҳаракатлари учун қаттиқ танқид қилинди. «Толибон» Кобулни қўлга олган пайтда Рааб Крит оролида таътилда бўлган, кейинчалик маълум бўлишича, у британияликларга ёрдам берган афғон таржимонларини эвакуация қилиш бўйича Афғонистон Ташқи ишлар вазирлиги билан боғланмаган. Шунингдек, Афғонистонни тарк этиш учун ёрдам сўраб мурожаат қилган одамларнинг минглаб хатларини ўқимаган.
Reuters хабарига кўра, Борис Жонсон турмуш даражаси ва даромадларнинг пандемиядан олдинги ҳолатга секин қайтаётгани туфайли ҳукумат ҳаракатларидан умумий норозилик фонида Вазирлар Маҳкамаси таркибини ўзгартирган.
Эслатиб ўтамиз, Буюк Британиянинг Афғонистондаги элчиси Лори Бристоу «Толибон» ҳокимиятни қўлга киритгандан кейин мамлакатни тарк этиши керак эди, лекин у британияликларга ва Британия ҳукумати билан алоқаси бор афғонларга ёрдам бериш учун қолган. 15 август куни Бристоу Британия элчихонаси кўчириб келинган Кобул аэропортида афғонларга шахсан ўзи виза берган.
Аввалроқ Буюк Британия Афғонистондан эвакуация қилинган афғонларга ўз ҳудудида доимий яшаш ҳуқуқини бериши ҳақида хабар қилинганди.
Изоҳ (0)