Ijtimoiy tarmoqlarda Andijon shahar hokimi Bahrom Haydarovning huquqini talab qilgan fuqaroni qamatish bilan tahdid qilgani haqida videoyozuvlar tarqaldi. Unda hokimning “Bir narsani aytyapman, Farrux, sizdan iltimos, ana shuni tugatib yuboraylik. Kim agar o‘sha yerga qarshi chiqsa, qamataman. Kim bo‘lishidan qat’i nazar”, — deganini eshitish mumkin.
Hokimning ushbu so‘zlariga javoban ayollardan biri “Kimni qamatasiz? U yerda men borman-da, qarshilik qiladigan? Nimaga qarshilik qilsam, qamatasiz? Mening uyim bor, xususiy mulkim bor. Qonuniy oraliq masofa, shaharsozlik normasi, sudning qarori bor. Qaror gapiradi. Sud qaroriga hamma bo‘ysunadi. Prezident qonun chiqarib qo‘yganmi, qo‘ygan. ‘Snos’ tashqarida turmayapti. Loyihaga tushib qolyaptimi, qolyapti. Men ham ertaga Sulton House’ga qarorimni o‘tkazaman, qonuniy gaplashaman”, — deya tortishadi.Andijon shahar hokimligi ushbu video yuzasidan rasmiy munosabat bildirdi.
Unda shahar hokimining Alisher Navoiy shohko‘chasi 63-uyda aholiga qulay shart-sharoitlar yaratish maqsadida zamonaviy loyihalar asosida qurilish ishlarini amalga oshirishga ruxsat berishi to‘g‘risidagi qarori qabul qilingani ta’kidlangan.
“Buzilish ishlari davomida har bir xonadon bilan kelishuvlarga erishilib, mavjud ma’nan eskirgan turar joylarni buzib, o‘rnida zamonaviy loyihalar asosida 12 qavatli turar joy inshootlari qurilishi belgilangan. Biroq shu uyda yashovchi fuqaro M.Shafiyeva pudratchi tashkilot mutasaddi rahbarlari bilan kelishuvga erishmagan holda, doimiy ravishda qurilish ishlariga to‘sqinlik qilib kelgan. Bundan tashqari, M.Shafiyevaga qurilish ishlari ketayotgan paytda boshqa manzilda vaqtinchalik yashab turishi uchun ijara pullari ham to‘lab berilgan. Shunga qaramasdan, fuqaro ushbu qurilish obyekti hududidagi uyini bo‘shatmasdan, uyining ta’miri uchun pullar undirib kelgan. Shuningdek, u pul undirish maqsadida qurilishda ishlash uchun kelgan transport vositalari yo‘liga o‘zini tashlab, tahdid qilishda davom etgan va ‘Fayzli shinam qurilish’ MChJning o‘z majburiyatlarini bajarolmasligiga sabab bo‘lgan”, — deyiladi hokimlik rasmiy munosabatida.
Qayd qilinishicha, Xalq deputatlari Andijon shahar kengashi deputatlari ham qurilish jarayonini o‘rganib, qurilish ishlarini yakuniga yetkazish uchun quruvchiga bir necha bor muddat ham bergan. Ammo ish yakuniga yetmagan. Shundan so‘ng deputatlar tomonidan ushbu qurilish ishlarini tez orada yakunlash va fuqarolarning e’tirozlarini bartaraf etish maqsadida kengashning navbatdagi sessiyasida qurilish ishlarini yakunlash Sulton House MChJga yuklatilgan. Biroq fuqaroning quruvchi ishiga aralashib, ishni ortga surishi davom etgan.
Hokimlik hokimning “Kim ushbu ishni qilsa, qamaladi” jumlasini izohlar ekan, “hokim fuqarolardan oldin ham pul olinib, qurilish ishlarini to‘xtatib qo‘ygan quruvchi harakatiga shahar IIB tomonidan huquqiy baho berilishi uchun surishtiruv ishlari davom etayotganini nazarda tutib, kelgusida bu kabi holat takrorlansa, qamoq bilan bog‘liq ehtiyot chorasi qo‘llanishi mumkinligi haqida ogohlantirgan”, — deydi.
Shuningdek, shahar hokimligi bila turib boshqa shaxsni sharmanda qiladigan uydirmalar tarqatish Jinoyat kodeksida nazarda tutilgan javobgarlikka sabab bo‘lishini eslatgan.
Izoh (0)