«Ўзбектелеком» АК Бухоро шаҳар телекоммуникация боғламаси собиқ ходими алоқа қудуғидан кўп миқдордаги кабелларни ўғирлагани учун унга нисбатан жиноят иши қўзғатилди. Бу ҳақда «Дарё»га Бухоро шаҳар ИИБ ҳузуридаги Тергов бўлими катта терговчиси, майор Жаҳонгир Юсупов маълум қилди.
Таъкидланишича, «Ўзбектелеком» АК Бухоро шаҳар телекоммуникация боғламаси собиқ ходими Ж.С. кўп миқдордаги мол-мулкни қўлга киритиш мақсадида ўғрилик содир қилган.У 2021 йилнинг 17 август куни соат 19:40 да Бухоро шаҳар Баҳоуддин Нақшбанд кўчасида жойлашган «Ўзбектелеком» АК Бухоро шаҳар телекоммуникация боғламасига тегишли бўлган алоқа қудуғидан ҳар бир метри 331 минг 258 сўм бўлган 270 метрли, жами баҳоси 89 миллион 439 минг 660 сўмлик ТПП 400х2 маркали кабелларни яширин равишда ўғирлаган вақтида корхона ходимлари томонидан қўлга тушган.
Маълумотга кўра, Ж.С. меҳнат фаолиятини 2007 йилдан пайвандловчи вазифасида бошлаган бўлиб, 2016 йилдан 2021 йил январь ойига қадар «Ўзбектелеком» АК Бухоро шаҳар телекоммуникация боғламаси, жорий таъмирлаш ва авария ҳолатини қайта тиклаш бригадаси олтинчи даражали кабел кавшарловчи лавозимида ишлаб келган. У 2021 йилнинг 28 март куни боғламага тегишли алоқа линияси қудуғига ноқонуний равишда кириб, кабелларни ўғирлаётганда телекоммуникация етакчи муҳандиси томонидан ушланган. Ҳолатдан хабар топган раҳбарият Ж.С.нинг узоқ йиллик меҳнатини инобатга олиб, ҳуқуқ-тартибот органларига мурожаат қилмаган ва огоҳлантирган. Орадан кўп ўтмай, 18 апрель куни у яна такроран алоқа линияси қудуғида ўғрилик содир этган. Ва бу хатти-ҳаракати учун 10 сутка маъмурий қамоқ жазосини ўтаган.
Жавобгарликдан хулоса чиқармаган Ж.С. кўп миқдордаги алоқа кабелларини ўғирлаш режасини тузган ва уни амалга оширган. Фуқаронинг ушбу хатти-ҳаракати Жиноят кодексининг 169-моддаси 3-қисми «в» банди (кўп миқдорда ўғрилик) дея баҳоланиб, унга нисбатан жиноят иши қўзғатилган. Ҳозирда иш юзасидан тергов ҳаракатлари олиб борилмоқда.
Изоҳ (0)