Buxoroda o‘g‘rilik sodir etgan telekommunikatsiya bog‘lamasi sobiq xodimiga nisbatan jinoyat ishi qo‘zg‘atildi

“O‘zbektelekom” AK Buxoro shahar telekommunikatsiya bog‘lamasi sobiq xodimi aloqa qudug‘idan ko‘p miqdordagi kabellarni o‘g‘irlagani uchun unga nisbatan jinoyat ishi qo‘zg‘atildi. Bu haqda “Daryo”ga Buxoro shahar IIB huzuridagi Tergov bo‘limi katta tergovchisi, mayor Jahongir Yusupov ma’lum qildi.

U 2021-yilning 17-avgust kuni soat 19:40 da Buxoro shahar Bahouddin Naqshband ko‘chasida joylashgan “O‘zbektelekom” AK Buxoro shahar telekommunikatsiya bog‘lamasiga tegishli bo‘lgan aloqa qudug‘idan har bir metri 331 ming 258 so‘m bo‘lgan 270 metrli, jami bahosi 89 million 439 ming 660 so‘mlik TPP 400x2 markali kabellarni yashirin ravishda o‘g‘irlagan vaqtida korxona xodimlari tomonidan qo‘lga tushgan.

Ma’lumotga ko‘ra, J.S. mehnat faoliyatini 2007-yildan payvandlovchi vazifasida boshlagan bo‘lib, 2016-yildan 2021-yil yanvar oyiga qadar “O‘zbektelekom” AK Buxoro shahar telekommunikatsiya bog‘lamasi, joriy ta’mirlash va avariya holatini qayta tiklash brigadasi oltinchi darajali kabel kavsharlovchi lavozimida ishlab kelgan. U 2021-yilning 28-mart kuni bog‘lamaga tegishli aloqa liniyasi qudug‘iga noqonuniy ravishda kirib, kabellarni o‘g‘irlayotganda telekommunikatsiya yetakchi muhandisi tomonidan ushlangan. Holatdan xabar topgan rahbariyat J.S.ning uzoq yillik mehnatini inobatga olib, huquq-tartibot organlariga murojaat qilmagan va ogohlantirgan. Oradan ko‘p o‘tmay, 18-aprel kuni u yana takroran aloqa liniyasi qudug‘ida o‘g‘rilik sodir etgan. Va bu xatti-harakati uchun 10 sutka ma’muriy qamoq jazosini o‘tagan.

Javobgarlikdan xulosa chiqarmagan J.S. ko‘p miqdordagi aloqa kabellarini o‘g‘irlash rejasini tuzgan va uni amalga oshirgan. Fuqaroning ushbu xatti-harakati Jinoyat kodeksining 169-moddasi 3-qismi “v” bandi (ko‘p miqdorda o‘g‘rilik) deya baholanib, unga nisbatan jinoyat ishi qo‘zg‘atilgan. Hozirda ish yuzasidan tergov harakatlari olib borilmoqda.