Андижон вилояти ҳокими Шуҳрат Абдураҳмонов Токио-2020 Паралимпия ўйинлари олтин медали совриндори Бобур Омоновга Андижон шаҳридан 2-хонали хонадон совға қилди. Бу ҳақда «Дарё» мухбири Умиджон Мамарасулов хабар бермоқда.
Таъкидланишича, 13 сентябрь куни Андижон шаҳридаги Бобур майдонида Токиода бўлиб ўтган ёзги Паралимпия ўйинлари ғолиби ва иштирокчиларини кутиб олиш ва тақдирлаш маросими ўтказилган.
Унда сўзга чиққан Шуҳрат Абдураҳмонов вилоят шаънини муносиб ҳимоя қилган, ядро улоқтириш бўйича Паралимпиада рекордини янгилаб, олтин медални қўлга киритган Бобур Омоновга Андижон шаҳрида яқинда фойдаланишга топширилган 16 қаватли уйдан 2-хонали хонадон калитини, чемпионнинг мураббийи Мавлон Ҳайдаровга 50 миллион сўм пул мукофотини топширган. Шунингдек, Паралимпия иштирокчилари Фирдавс Мусабеков, Музаффар Турсунхўжаев, Муслима Одилова, Бекжон Чеваров, Темур Ғиёсовларга ўз миннатдорлигини билдириб, эсдалик совғалари билан тақдирлаган.
Тадбирда таъкидланишича, Бобур Омоновга «Ўзбекистон ифтихори», мураббий Мавлон Ҳайдаровга эса «Ўзбекистон Республикасида хизмат кўрсатган спорт устози» фахрий унвони берилган, Паралимпия иштирокчиси Темурбек Ғиёсов эса «Шуҳрат» медали билан тақдирланган.
Эслатиб ўтамиз, аввалроқ Токио—2020 Паралимпиадаси совриндорларига Tahoe, Traverse, Trailblazer автомобиллари ва Тошкент шаҳридан уйлар топширилгани ҳақида хабар берилганди.
Изоҳ (0)