Navoiyda mahalladoshining chorva boqiladigan yaylovidan ikki bosh qoramol o‘g‘irlagan 18 yoshli yigitga jinoyat ishi qo‘zg‘atildi. Bu haqda “Daryo”ga viloyat IIB axborot xizmati rahbari O‘ktam Usmonov ma’lum qildi.

Ta’kidlanishicha, Xatirchi tumanidagi “Quchchi” mahallasida yashovchi 18 yoshli M.T. mahalladoshi E.M.ga tegishli chorvalari boqiladigan yayloviga tez-tez borib turgan. Yaylovga serqatnov bo‘lib qolgan M.T. vaziyatni zimdan o‘rgangan.

Rejaga ko‘ra, joriy yilning 5-sentabr kuni tunda fuqaro M.T. mahalladoshiga tegishli bo‘lgan ikki bosh qoramolni o‘g‘irlab, o‘sha tuniyoq mol bozoriga olib borgan va 11 million so‘mga sotib yuborgan.

E.M. esa tongda ikki bosh qoramolining notanish kimsalar tomonidan o‘g‘irlanganini payqab, Xatirchi tuman IIBga xabar bergan. Arizaga ko‘ra, hududda tezkor-qidiruv ishlarini olib borgan ichki ishlar xodimlari yo‘qolgan ikki bosh qoramol qo‘shni qishloqda yashovchi fuqaro Sh.T.ning molxonasida bog‘lab qo‘yilganining guvohi bo‘lgan. Olib borilgan surishtiruv ishlari davomida Sh.T. ushbu ikki bosh qoramolni “Quchchi” mahallasidagi M.T.dan mol bozorida sotib olganini, ammo ularning o‘g‘irlanganidan xabari bo‘lmaganini bildirgan.

Holat yuzasidan olib borilgan surishtiruvlarga ko‘ra, 18 yoshli M.T. avvaliga qilmishidan tongan. So‘ngra tergov jarayonida o‘z aybiga iqror bo‘lib, qilmishidan pushaymonligini bildirgan. Unga Jinoyat kodeksining 169-moddasi (o‘g‘rilik) bilan jinoyat ishi qo‘zg‘atilgan.

Ta’kidlash lozim, ushbu modda bilan ayblangan fuqaroning aybi isbotlansa, aybdor bazaviy hisoblash miqdorining ellik baravarigacha miqdorda jarima yoki uch yuz oltmish soatgacha majburiy jamoat ishlari yoki ikki yilgacha axloq tuzatish ishlari yoki bir yildan uch yilgacha ozodlikni cheklash yoxud uch yilgacha ozodlikdan mahrum qilish bilan jazolanadi.