Онасининг қистови билан янги туғилган чақалоғини 8 миллион сўмга сотишга уринган 35 ёшли бухоролик аёлга суд ҳукми ўқилди. Бу ҳақда «Дарё»га Ғиждувон тумани суди раиси Бобур Умаров маълум қилди.
Маълум бўлишича, фуқаро Ф.Ж. 2019 йилдан бери турмуш ўртоғи А.А. билан оилавий келишмовчилик сабаб алоҳида яшаб келган. Шунга қарамасдан, икки нафар вояга етмаган фарзандини ёлғиз тарбиялаб келаётган аёл ҳомиладор бўлиб қолган. Аёлнинг 58 ёшли онаси болани олдириш қизининг соғлиғи учун хавфли эканини инобатга олиб, қизининг болани дунёга келтиришига қаршилик кўрсатмаган.Ф.Ж. 2021 йилнинг 8 апрель куни фарзандини Ғиждувон тумани тиббиёт бирлашмаси туғруқ бўлимида дунёга келтиргач, онаси қизининг эри билан яшамаслигини, боланинг отаси кимлиги ҳам номаълум бўлгани учун чақалоқни қишлоққа олиб боролмаслигини, қўни-қўшнилар ва қариндошлар олдида шарманда бўлиши мумкинлигини айтган.
«Шу сабаб она қизидан фарзандини сотишни талаб қилган. Ф.Ж. эса боласининг сотиб юборилишига қарши бўлиб, унинг талабини рад этган. Шунга қарамасдан, она қизига ўз ҳукмини ўтказиб, чақалоқни сотиб юборишга ундаган. Орадан бир неча кун ўтгач, она ва қиз 12 йилдан бери фарзандсизликдан қийналиб, бола сотиб олиш истагида юрган эр-хотин ‘мижоз’ни топишган. Аёлнинг онаси бола сотиб олишга шай фуқаролар Н.Р. ҳамда Ш.Н.ларга қизининг фуқаролик паспорти ва никоҳ хатини бериб, янги туғилган чақалоққа зудлик билан гувоҳнома тайёрлашни буюрган. Ва чақалоқни бериб юбориш эвазига улардан 8 миллион сўм пул талаб қилган. Аввалига янги туғилган чақалоғининг сотиб юборилишига қаршилик кўрсатган Ф.Ж. кейинчалик шунча миқдорда манфаат кўришини кўзлаб, уни сотишга рози бўлган. Н.Р. ҳамда Ш.Н.лар туғруқхонадан болага рухсат берилган кун чақалоқнинг туғилганлиги ҳақидаги гувоҳномасини тайёрлаб келишган ва болани сотиб олиш учун Ғиждувон тумани марказий шифохонаси туғруқ бўлими ҳовлисида Ф.Ж.билан учрашган. Ф.Ж. 8 миллион сўм миқдоридаги пулларни улардан олиб, чақалоқни берган вақтда вилоят ИИБ ва Ғиждувон тумани ИИБ ходимлари томонидан қўлга олинган», — дейди судья Бобур Умаров.
Суд ҳайъати одам савдоси билан шуғулланган она ва қизининг хатти-ҳаракатига баҳо бериб, уларни Жиноят кодексининг 135-моддаси (одам савдоси) билан айбли деб топган. Бироқ Ф.Ж.нинг вояга етмаган икки нафар фарзанди борлиги, онасининг қистови билан бола савдосига қўл ургани ва бундан чин кўнгилдан пушаймонлиги инобатга олиниб, унга нисбатан Жиноят кодексининг 72-моддаси (шартли ҳукм қилиш) қўлланган. Ушбу моддага кўра, айбдор учун тайинланган озодликдан маҳрум этиш жазоси шартли ҳисобланиб, 3 йил синов муддати белгиланади.
Шунингдек, аёлнинг онаси Ш.Р.нинг ҳам ўз айбига иқрорлиги, қишлоқда шарманда бўлмаслик учун қилаётган хатти-ҳаракатини бошқара олмагани инобатга олиниб, унга нисбатан Жиноят кодексининг 57-моддаси (айбга иқрорлик тўғрисида келишув тузилган жиноятлар бўйича жазо тайинлаш) қўлланган ва жазодан озод қилинган.
Изоҳ (0)