Ўзбекистонда 26 сентябрь Давлат хавфсизлик хизмати органлари ходимлари куни этиб белгиланди. Адлия вазирлиги матбуот хизматининг хабар беришича, 14 сентябрь куни Президент бу ҳақда тегишли қонунни имзолади.
Бунга қадар 2018 йил 2 октябрдаги «Ўзбекистон Республикаси Давлат хавфсизлик хизмати кунини белгилаш тўғрисида»ги қонунга кўра, ДХХ касб байрами 5 апрель куни нишонланар эди.
Эслатиб ўтамиз, Сенат янги қонунни август охирларида маъқуллаган эди. Ҳужжат лойиҳаси муҳокамасида сенаторлар ДХХ тарихи аслида Ўзбекистон ССР Давлат хавфсизлиги Иттифоқ — республика комитети тугатилиб, Миллий хавфсизлик бошқармаси тузилиши белгиланган 1991 йил 26 сентябрдаги Президент фармонига бориб тақалишини қайд этган эди.
«Ўзбекистон Республикаси Миллий хавфсизлик бошқармаси биринчи навбатда разведка, контрразведка ва уюшган жиноятчиликка қарши кураш билан шуғулланиши кераклиги белгилаб қўйилсин. Собиқ Давлат хавфсизлиги комитетининг юқорида санаб ўтилган вазифалар билан боғлиқ бўлмаган ва Ўзбекистон Республикаси Конституциясига зид барча тузилма, бўлинмалари ва бўлимларини тугатиш кўзда тутилсин», — дейилган эди фармонда.
«Шу боис Ўзбекистон Республикаси давлат мустақиллигининг 30 йиллик байрами нишонланганидан сўнг, 26 сентябрь куни Давлат хавфсизлик хизматининг 30 йиллигини ўтказиш мантиқан тўғри ҳисобланади.
Ушбу қонун қабул қилиниши натижасида 2018 йил 2 октябрда қабул қилинган ‘Ўзбекистон Республикаси Давлат хавфсизлик хизмати кунини белгилаш тўғрисида’ги қонун ўз кучини йўқотади ва 26 сентябрь тарихий санаси асосида юртимизда Ўзбекистон Республикаси Давлат хавфсизлик хизмати органлари ходимлари куни сифатида нишонланади», — дея қайд этилган эди Сенат ахборотида.
Изоҳ (0)