Кобул аэропортида аёллар ўз ишига қайтди
Кобулдаги Ҳамид Карзай номли халқаро аэропортда аёллар яна ўз ишларига қайтди, деб ёзади Anadolu агентлиги.
Фото: Anadolu Agency
31 август куни Америка қўшинлари Афғонистондан тўлиқ олиб кетилганидан кейин аэропорт «Толибон» ҳаракати назорати остига ўтган эди, энди ҳаво бандаргоҳи аста-секинлик билан нормал иш фаолиятига қайтмоқда.
Аэропорт маъмурияти хабарига кўра, 30 га яқин аёллар турли департаментлардаги иш жойларига қайтган. Яқин кунларда уларнинг сони 60 нафаргача ортади.
Аэропорт директори Мавлавий Абдулҳоди Ҳамадан маълум қилишича, шариат доирасида аёллар ишлаш ҳуқуқига эга ва аэропортда ишлаган аввалги ходималарнинг барчаси ўз лавозимларига қайтган.
Ҳамаданнинг эслатишича, «Толибон» давлат муассасаларида фаолият юритган аёлларнинг барчасини ишга қайтишга чақирган.
«Биз аэропорт ходималарини ҳам ишга қайтардик. Барча ходимларимиз аввалги режимда ишламоқда», — деди у.
Аноним қолишни истаган аэропорт ходималаридан бири ишга қайтишдан мамнун эканини айтиб, «Толибон» маошлар масаласини ҳал қилишини исташини билдирди.
«Толибон» етакчилари ҳукумат таркиби туфайли жанжаллашиб қолди
Афғонистонни ўз назоратига олган «Толибон» раҳбарлари орасида жиддий зиддият юзага келди, деб ёзади Daily Mail.
«Толибон» ҳаракатининг юқори мансабли вакиллари маълум қилишича, президент саройидаги мажлис чоғида ҳаракат асосчиларидан бири бош вазир ўринбосари Абдулғани Биродар қочқинлар иши бўйича вазир ҳамда толиблар билан яқин алоқада бўлган «Ҳаққоний тармоғи»нинг атоқли вакили Халил Раҳмон Ҳаққоний билан жанжаллашиб қолган. Ҳатто уларнинг тарафдорлари ўзаро муштлашиб кетган.
Баҳсга Биродарнинг Афғонистон янги ҳукуматининг тузилмасидан норозилиги сабаб бўлган. Шунингдек, толибларнинг Афғонистондаги ғалабаси кимнинг шарофати билан бўлгани юзасидан ҳам келишмовчилик келиб чиққан.
Биродарнинг фикрича, ўзи каби одамлар томонидан олиб борилган дипломатияга урғу берилиши керак. «Ҳаққоний тармоғи» гуруҳи аъзолари эса ғалабага жанговар ҳаракатлар туфайли эришилди, деган фикрда.
Таъкидланишича, айнан Биродар АҚШ президенти билан бевосита музокаралар олиб борган толибларнинг тарихдаги биринчи юқори лавозимли вакили бўлган: 2020 йилда у телефон орқали Дональд Трамп билан гаплашган. Бунгача у Доҳада битимни имзолаб, унга мувофиқ Афғонистондан Америка қўшинлари олиб кетилган эди.
«Ҳаққоний тармоғи»ни эса сўнгги йилларда Афғонистон Қуролли кучлари ва уларнинг ғарблик иттифоқдошларига қарши олиб борилган энг қирғинбарот ҳужумлар билан боғлашади. АҚШ ҳукумати уни террорчилик ташкилоти деб ҳисоблайди. «Ҳаққоний тармоғи» етакчиси Сирожиддин Ҳаққоний Афғонистоннинг янги ҳукуматида ички ишлар вазири этиб тайинланган.
Толиблар ўртасидаги келишмовчиликлар ҳақида ўтган ҳафта Биродар омма олдига чиқмай қўйганидан кейин миш-мишлар пайдо бўлганди. Ҳатто ижтимоий тармоқларда унинг вафоти ҳақида тахминлар илгари сурилган.
Аммо толиблар орасидаги манбалар айтишича, зиддиятдан кейин Биродар Кобулни тарк этиб, Қандаҳорга жўнаб кетган.
Янги афғон ҳукумати мамлакатда кучли армия тузмоқчи
Афғонистонда ҳокимият тепасига келган «Толибон» ҳаракати мамлакатда мунтазам армия тузишни режалаштирмоқда.
«Яқин келажакда биз кучли ва тартибли армия тузамиз», — деди толиблар кучлари штаб бошлиғи Қори Фосиҳуддин 15 сентябрь куни. Унинг сўзларига кўра, «айни пайтда армия яратиш ҳақида маслаҳатлашувлар олиб борилмоқда».
Аввалроқ АҚШ давлат котиби Энтони Блинкен ўтган 20 йил ичида бу мамлакатда самарали миллий қуролли кучларни яратишга муваффақ бўлинмаганини айтганди.
Қандаҳорда минглаб афғонистонликлар толибларга қарши намойишга чиқди
Афғонистоннинг Қандаҳор шаҳрида минглаб аҳоли «Толибон»нинг буйруғига қарши чиқди, деб ёзади Reuters.
3000 га яқин оиладан армия гарнизони яқинидаги ҳудудни тарк этиш сўралганидан кейин намойишчилар Қандаҳордаги губернатор уйи ёнига йиғилган.
Таъкидланишича, гарнизон ҳудудига кўплаб афғонлар хусусий уйлар қуриб олган. Уй-жойлар давлат ерида барпо қилинган ва у ерда асосан истеъфодаги армия генераллари ва Афғонистон хавфсизлик кучларининг бошқа ҳарбий хизматчилари оилалари яшайди.
Шу сабабли минглаб афғонлар мажбурий кўчириб юборилишга қарши бош кўтариб, Қандаҳор кўчаларига чиқди. Одамлар молиявий қийинчиликлардан шикоят қилиб, ҳатто егулик сотиб олишга пули йўқлигини айтмоқда.
Собиқ ҳукумат амалдори Reuters’га маълум қилишича, одамларга бу ҳудудни тарк этиш учун уч кун муддат берилган, шу билан бирга, ўзлари билан шахсий буюмларни олишга рухсат этилмаган. «Толибон» бу ҳудудга ўз бўлинмаларини жойлаштиришни режалаштирмоқда.
Мавзуга доир: Тожикистонда Панжшер ва Афғонистон қаршилик фронтини қўллаб-қувватлаб намойиш ўтказилди (фото ва видео)
АҚШ собиқ президентлари афғонистонлик қочқинларга ёрдам бериш учун бирлашди
АҚШнинг уч нафар собиқ президенти — республикачи кичик Жорж Буш ҳамда демократлар Билл Клинтон ва Барак Обама афғонистонлик қочқинларга ёрдам бериш вазифасини ўз олдига қўйган янги ташкилотга қўшилди, деб ёзади Reuters.
Америка собиқ етакчилари ва уларнинг рафиқалари АҚШ қўшинлари олиб кетилганидан кейин Америкага эвакуация қилинган афғонистонлик қочқинларга ёрдам бериш мақсадидаги Welcome.US нотижорат ташкилотлар ва бизнес-тузилмалар коалицияси таркибида ишлайди.
