Сўнгги йилларда ўзбекистонликлар орасида хорижда ўқиш ва яшаш истаги тобора ортиб бормоқда. Айниқса, чет тилларини ўзлаштириб, дунё ОТМларига ўқишга кираётган ёшлар сафи кенгаймоқда. Кўпчиликда хорижда таҳсил олишга интилиш ҳолати ҳар бир даврда бўлиши табиий. Айни вақтда Ўзбекистон ҳукумати ва бошқарув тизимида турли лавозимларда фаолият юритаётган шахслар ҳам ўз вақтида хорижда ўқиган.
«Дарё» дунёнинг турли нуқталарида жойлашган университет ва институтларда таҳсил олган ўзбек амалдорларини бир саҳифага жамлади.
Саида Мирзиёева
Миллий масс-медиани қўллаб-қувватлаш ва ривожлантириш жамоат фонди Васийлик кенгаши раиси ўринбосари Саида Мирзиёева 2001—2006 йилларда Жаҳон иқтисодиёти ва дипломатия университетининг халқаро ҳуқуқ бўйича бакалавр даражасини олган. 2006—2008 йилларда Тошкент давлат юридик университетининг ҳуқуқшунослик магистри, 2008—2010 йилларда М.В. Ломоносов номидаги Москва давлат университетининг иқтисод фанлари магистри ҳисобланади.
37 яшар Саида Мирзиёева 2021 йилнинг 25 июнь куни М.В. Ломоносов номидаги Москва давлат университетида иқтисодиёт бўйича диссертация (PhD) ёқлади.
Азиз Абдуҳакимов
Ўзбекистон бош вазирининг 47 ёшли ўринбосари, туризм ва спорт вазири Азиз Абдуҳакимов Тошкент давлат иқтисодиёт университетини битиргач, 1999—2001 йилларда Япониядаги Ҳитоцубаши университетининг халқаро иқтисодий муносабатлар йўналиши бўйича магистратурани тамомлаган.
Сардор Умрзоқов
Бош вазир ўринбосари, инвестициялар ва ташқи савдо вазири Сардор Умрзоқов 1998 йили Тошкент давлат иқтисодиёт университетининг Халқаро молия ва банк иши факультетини тамомлаган.
44 ёшли ҳукумат вакили 1998—1999 йилларда Буюк Британиядаги Рединг университетида «Банк иши» мутахассислиги бўйича магистратурада ўқиган. У иқтисодий фанлар бўйича фалсафа доктори (PhD) илмий унвонга эга.
Иброҳим Абдураҳмонов
Инновацион ривожланиш вазири Иброҳим Абдураҳмонов 1992—1997 йилларда ҳозирги ЎзМУнинг Биология-тупроқшунослик факультетида таҳсил олган.
1998—2001 йилларда Ўзбекистон Президентининг «Умид» жамғармаси йўлланмаси билан АҚШнинг Техас қишлоқ хўжалиги ва механика университетида ўқиб, ўсимликлар селекцияси ва генлар инженерлиги соҳаси бўйича магистр даражасига эга бўлган.
46 ёшга тўлган Абдураҳмонов биология фанлари доктори, профессор. 2014 йилда Бутунжаҳон Фанлар академияси (ТWАS) ва 2017 йил ЎзР Фанлар академияси академигига айланган.
Шерзод Шерматов
Апрель ойида 44 ёшни қаршилаган Халқ таълими вазири Шерзод Шерматов Тошкент давлат техника университетининг 1998 йилги бакалавриат битирувчиси ҳисобланади. У ҳам «Умид» жамғармаси йўлланмаси билан 1998—2000 йилларда АҚШнинг Йель университетида таҳсил олиб, халқаро ва ривожланиш иқтисоди мутахассислиги бўйича магистр дипломини қўлга киритган.
Отабек Назиров
Инвестициялар ва ташқи савдо вазирининг 46 ёшли маслаҳатчиси — Ўзбекистоннинг тўғридан-тўғри инвестициялар жамғармаси бош директори Отабек Назиров ҳам океан ортида таҳсил олган.
У 1998 йилда макроиқтисодиёт ихтисослиги бўйича АҚШдаги Нью-Йорк давлат университетини тамомлаган. Маълум вақт Америкадаги Goldman Sachs ва JPMorgan Chase, Россиядаги «Тройка Диалог» ва МДМ Банк каби йирик молиявий ва инвестиция компанияларида, шунингдек, Европа тикланиш ва тараққиёт банкида меҳнат қилган.
Нарзулло Обломуродов
Ўзбекистон Экологик партияси раиси Нарзулло Обломуродов мутахассислиги бўйича иқтисодчи. 1996 йили Жаҳон иқтисодиёти ва дипломатия университетини битирган. 1999—2000 йилларда Буюк Британиянинг Бирмингҳем университетида Халкаро молия ва банк иши йўналиши бўйича магистратурада ўқиган.
46 ёшли Нарзулло Обломуродов 2008 йил ЎзМУда иқтисод фанлари номзодлик ишини ҳимоя қилган ва худди шу йили унга доцент илмий унвони берилган.
Алишер Қодиров
Ўзбекистон «Миллий тикланиш» демократик партияси раиси Алишер Қодиров 1991—1996 йилларда Туркиядаги Эгей университетида ўқиган. 46 ёшли таниқли депутатнинг бакалавр даражаси бўйича мутахассислиги филолог. 2009 йилда Тошкент молия институтининг сиртқи бўлимини тамомлаган.
Фарҳод Ибрагимов
Тошкентдаги IТ-парк директори Фарҳод Ибрагимовнинг мутахассислиги: ҳуқуқшунос, халқаро бизнес, кўчмас мулкни бошқариш, давлат бошқаруви, иқтисодиёт ва АКТ соҳасидаги бошқарув.
38 ёшли Ибрагимов 2000—2004 йилларда Тошкент давлат иқтисодиёт университетида ўқиган. 2005 йилда Швеция Қироллик технология институтининг магистратура босқичини тугатган. 2015 йилда Жанубий Кореядаги давлат хизматчиларини тайёрлаш Марказий институтини битирган.
Тимур Ишметов
42 ёшли Молия вазири Тимур Ишметов 2000 йилда Тошкент молия институтини тамомлаган. 2003—2005 йилларда Буюк Британиядаги Бирмингҳем университетида Халқаро пул ва банк иши бўйича магистр даражасини олган. Шунингдек, у 2008 йилда Тошкент давлат юридик университетининг юриспруденсия факультетини ҳам тугатган.
Русланбек Давлетов
Адлия вазири Русланбек Давлетов мутахассислиги бўйича ҳуқуқшунос, иқтисодчи. У 1996—2001 йилларда Буюк Британиянинг Уорик университетида ўқиган. 2003 йилда Жаҳон иқтисодиёти ва дипломатия университетининг магистратура босқичини, 2007 йил Тошкент давлат иқтисодиёт университети ва 2010 йил Ўзбекистон Республикаси Президенти ҳузуридаги давлат ва жамият қурилиши академиясини тамомлаган.
41 ёшли Давлетов 1-даражали адлия маслаҳатчиси ҳисобланади.
Акмал Бурхонов
Коррупцияга қарши курашиш агентлиги директори Акмал Бурхонов учта олий ўқув юртида таҳсил олган. У Тошкент давлат юридик институтининг 2001 йилдаги бакалавр битирувчиси саналади. Май ойида 40 ёшни қаршилаган Бурхонов 2001—2003 йилларда Москва давлат юридик институтида, 2005—2007 йилларда Япониядаги Нагоя университетида ўқиган.
Абдулла Азизов
Соғлиқни сақлаш вазири ўринбосари Абдулла Азизов 2004 йил Жаҳон иқтисодиёти ва дипломатия университетининг Халқаро иқтисодий муносабатлар факультетини тамомлаган. 2004—2006 йилларда Даниянинг Орхус университетида молия ва халқаро бизнес йўналиши бўйича магистр даражасини олган. 2006 йилда Даниянинг Орхус техника коллежини тамомлаган ва IT-дастурчи сифатида меҳнат фаолиятини бошлаган.
Шуҳрат Сатторов
Республика таълим марказининг 36 яшар директори Шуҳрат Сатторов 2004—2008 йилларда Ўзбекистон давлат жаҳон тиллари университетининг Халқаро журналистика факультетида ўқиган. 2010 йили Ҳиндистоннинг Пуна университетини, 2020 йили Жанубий Кореянинг Ёнсей университетининг Давлат ва бизнес бошқаруви факультетини битирган.
Миролим Исажонов тайёрлади
Изоҳ (0)