Ўзбекистон аҳолиси 2021 йилнинг январь–август ойларида нақд пул ечиб олишни оширди. Бу ҳақда Марказий банк нақд пул муомаласи бўйича қисқача шарҳида маълум қилди.
Қайд этилишича, бу вақт давомида банклар орқали нақд пул айланмаси ҳажми 317,4 триллион сўмни ташкил этган. Бу 2020 йилнинг мос даврига нисбатан 48,8 фоизга кўп. Жумладан, банклар кассаларига нақд пул тушумлари 157,6 триллион сўмни, чиқим қилинган нақд пуллар эса 159,9 триллион сўмни ташкил этган.
Январь–август ойларида банк карталарига 178,1 триллион сўмлик маблағлар келиб тушиб, ушбу даврда банк карталаридаги 58,8 триллион сўмлик (33 фоиз) маблағлар аҳоли томонидан нақдлаштириб олинган.
Банк кассаларидан (шу жумладан, банкоматлардан) берилган нақд пуллар 2020 йилнинг январь–август ойларига нисбатан 50,8 триллион сўмга ошиши кузатилган бўлса, ушбу ўсишнинг асосий қисми банк карталаридан нақд пул ечиш ҳажми 21,4 триллион сўмга ҳамда банклар томонидан аҳолидан нақд чет эл валютасини сотиб олиш учун 16,6 триллион сўм ошиши ҳисобига юзага келди.
Изоҳ (0)