Намангандаги 26-Меҳрибонлик уйининг уч нафар тарбияланувчиси оилавий меҳрибонлик уйига йўл олди. Бундай тажриба вилоятда илк бор йўлга қўйилмоқда, дея хабар беради «Дарё» мухбири Азизбек Абдувалиев.
Тарбияланувчилар — Мадина, Дилдора ва Исломжон Камолиддиновлар бир оила вакиллари. Улар ота-оналари бевақт вафот этганидан сўнг Меҳрибонлик уйига қабул қилинганди. Орадан уч йилга яқин вақт ўтиб, ўзлари учун қадрдон бўлиб қолган даргоҳ билан хайрлашишди. Уларни Тўрақўрғон туманидаги Нурматовлар оиласи бағрига олади.
«Йил бошида Меҳрибонлик уйимизда 72 нафар тарбияланувчи бор эди. Бугунги кунга келиб улардан 35 нафари қоляпти. Давлат раҳбари ташаббуси билан ишлаб чиқилган янги тизим туфайли болаларимиз оилаларга қайтяпти. Кимларнидир яқинлари олиб кетяпти, кимларнидир болага муҳтож бўлганлар, яна кимларнидир оилавий меҳрибонлик уйлари кутмоқда. Тўғри, бизда барча шароитлар етарли, муассасамиз Президент ташрифидан сўнг Ўзбекистон касаба уюшмалари Федерацияси томонидан яқинда жуда чиройли ва мукаммал тарзда таъмирдан чиқариб берилди. Лекин барибир биз оила ўрнини босолмаймиз, буни тан олиш керак. Биз учун фарзандларимиз қатори бўлган тарбияланувчиларимиз бирин-кетин уйимизни тарк этаётганидан юрагимиз эзилса, бошқа тарафдан улар учун хурсандмиз. Чунки бола тарбиясида оила муҳитининг ўрни бўлак», — дейди Меҳрибонлик уйи директори Дилором Абдураҳимова.
Болаларни қабул қилиб олган тўрақўрғонлик Ибодат опа Нурматованинг айтишича, уларнинг марҳум онаси билан Наманган шойи ишлаб чиқариш комбинатида кўп йиллар давомида бирга ишлашган ва опа-сингилдек бўлиб кетишган. Аёлнинг аввал турмуш ўртоғи вафот этади, орадан йиллар ўтиб унинг ўзи ҳам оғир хасталикка чалинади. Вафотидан олдин Ибодат опага болаларини ташлаб қўймасликни васият қилади. Аммо ўша пайтда ҳужжатлар билан боғлиқ турли муаммолар туфайли бунинг имкони бўлмайди ва улар Меҳрибонлик уйига жойлаштирилади. Энди бу кунлар ортда қолди.
«Ўзимнинг тўрт нафар фарзандим бор. Ўғилларни уйлаганмиз, қизларни чиқарганмиз, набиралар қуршовидамиз. Худога шукр, оиламиз ўзига тўқ, нолийдиган жойимиз йўқ. Тўнғич ўғлимиз катта уста, алоҳида ҳовли-жой қилиб чиқиб кетган, биз билан қолган кичиги новвойхонани юритади. Уйда мол-қўй, товуқ, экин-тикинларимиз бор. Ўзимнинг тутинган синглимни норасидаларини бағримга олаётганимдан хурсандман. Уларни парваришлаш, таълим-тарбиясини зиммамизга оламиз. Бунга яқиндан кўмак бераётган Миллий гвардия вакилларига раҳмат», — дейди Ибодат опа.
Собиқ тарбияланувчиларнинг янги уйлари яқинида отамерос ҳовлилари ҳам бор экан. Улар ота-оналари оламдан ўтгунига қадар шу ерда яшашган. Ҳовли ҳозирги кунда қаровсиз ҳолга келган: яшаб турган уйлари нураган, қурилишига қўл урилганлари эса чала қолиб кетган. Эски уйларни таъмирлаш, янгиларини эса охирига етказишни «Саховат-Наманган» хайрия жамоат фонди зиммасига олди.
«Насиб, эрта-индиндан бу хонадонга усталар тушади. Мақсадимиз узоғи икки-уч ой ичида бу ҳовлини шинам ҳолга келтириш. Қишга қолмай болалар бу ерга кўчиб келишлари ва янги оилалари билан шу ерда яшашлари мумкин. Шунингдек, уларнинг таълим олиш билан боғлиқ харажатларини ҳам кўтаришга тайёрмиз», — дейди фонд бошқарув кенгаши аъзоси Абдулаҳад Аҳмаджонов.
Оилавий меҳрибонлик уйига келган болаларнинг бир олам ниятлари бор. Уларнинг каттаси — Мадина Тошкент тиббиёт академиясига ўқишга кирмоқчи, шифокор бўлиш ниятида. Дилдора эса ўзини Миллий гвардия сафида кўрмоқда. Кенжатой Исломжон эса спорт, хусусан, футболнинг ашаддий мухлиси. Келгусида кумири — Мадриднинг «Реал» клуби ҳимоячиси Марсело каби забардаст футболчи бўлиб, Наманган довруғини дунёга таратмоқчи. Болаларнинг беғубор орзулар, албатта, ушалишини тилаб, улар билан хайрлашдик.
Изоҳ (0)