Гаити пойтахти Порт-о-Пренс прокурори Бед-Фор Клод 10 сентябрь куни мамлакат бош вазири Ариэл Анрига судга чақирув қоғозини юборди. Бош вазир президент Жовенел Моизнинг ўлдирилиши юзасидан гувоҳлик бериш учун прокуратурага чақирилган, деб ёзади «ТАСС».
Ҳужжатга кўра, республика ҳукумати раҳбари 14 сентябрь куни судга келиши керак.«Чақирув қоғозида айтилишича, бош вазир ва асосий гумондорлардан бири Жозеф-Феликс Бадю президент ўлдирилган куни телефон орқали гаплашгани тасдиқланган», — дея хабар берди Gazette Haiti маҳаллий ахборот портали. Нашрнинг қайд этишича, тегишли маълумотлар мамлакатдаги сиёсий инқирозни ҳал қилиш бўйича ҳукумат ва мухолифатчилар ўртасида шартнома имзоланишидан бир кун олдин пайдо бўлган.
Гаити президенти Жовенел Моиз 7 июлга ўтар кечаси қуролли ҳужумчилар томонидан ўз қароргоҳида отиб ўлдирилган. Ҳодисада президентнинг рафиқаси ҳам оғир жароҳат олган, аммо у АҚШга олиб кетилиб, тиббий ёрдам билан ҳаёти сақлаб қолинган. Мамлакат бош вазири вазифасини вақтинчалик бажарувчи Клод Жозефнинг айтишича, ҳужум қилганлар инглиз ва испан тилларида сўзлашган. Гаити овоз бериш ва партиялараро алоқа ишлари вазири Матиас Пьернинг таъкидлашича, Моизнинг ўлдирилиши 26 кишидан иборат тўда томонидан уюштирилган. Улардан тўрт нафари отиб ташланган.
Кейинроқ Жовенел Моизга қарши операцияни тайёрлашда марказий шахс бўлиши мумкин бўлган одам — келиб чиқиши гаитилик бўлган шифокор Кристиан Эммануэль Санон ҳибсга олинди.
Изоҳ (0)