Навоийда маҳалладошининг чорва боқиладиган яйловидан икки бош қорамол ўғирлаган 18 ёшли йигитга жиноят иши қўзғатилди. Бу ҳақда «Дарё»га вилоят ИИБ ахборот хизмати раҳбари Ўктам Усмонов маълум қилди.
Таъкидланишича, Хатирчи туманидаги «Қуччи» маҳалласида яшовчи 18 ёшли М.Т. маҳалладоши Э.М.га тегишли чорвалари боқиладиган яйловига тез-тез бориб турган. Яйловга серқатнов бўлиб қолган М.Т. вазиятни зимдан ўрганган.Режага кўра, жорий йилнинг 5 сентябрь куни тунда фуқаро М.Т. маҳалладошига тегишли бўлган икки бош қорамолни ўғирлаб, ўша туниёқ мол бозорига олиб борган ва 11 миллион сўмга сотиб юборган.
Э.М. эса тонгда икки бош қорамолининг нотаниш кимсалар томонидан ўғирланганини пайқаб, Хатирчи туман ИИБга хабар берган. Аризага кўра, ҳудудда тезкор-қидирув ишларини олиб борган ички ишлар ходимлари йўқолган икки бош қорамол қўшни қишлоқда яшовчи фуқаро Ш.Т.нинг молхонасида боғлаб қўйилганининг гувоҳи бўлган. Олиб борилган суриштирув ишлари давомида Ш.Т. ушбу икки бош қорамолни «Қуччи» маҳалласидаги М.Т.дан мол бозорида сотиб олганини, аммо уларнинг ўғирланганидан хабари бўлмаганини билдирган.
Ҳолат юзасидан олиб борилган суриштирувларга кўра, 18 ёшли М.Т. аввалига қилмишидан тонган. Сўнгра тергов жараёнида ўз айбига иқрор бўлиб, қилмишидан пушаймонлигини билдирган. Унга Жиноят кодексининг 169-моддаси (ўғрилик) билан жиноят иши қўзғатилган.
Таъкидлаш лозим, ушбу модда билан айбланган фуқаронинг айби исботланса, айбдор базавий ҳисоблаш миқдорининг эллик бараваригача миқдорда жарима ёки уч юз олтмиш соатгача мажбурий жамоат ишлари ёки икки йилгача ахлоқ тузатиш ишлари ёки бир йилдан уч йилгача озодликни чеклаш ёхуд уч йилгача озодликдан маҳрум қилиш билан жазоланади.
Изоҳ (0)