Хитой Афғонистонга тезкор ёрдам сифатида озиқ-овқат маҳсулотлари, вакциналар, тиббий воситалар ва қишки товарларни тақдим этади. Ушбу мақсадлар учун 200 миллион юань — тахминан 30 миллион АҚШ доллари миқдорида маблағ ажратилган. Бу ҳақда Хитой ташқи ишлар вазири Ван И маълум қилди, деб ёзмоқда «Коммерсантъ».
«Хитой афғон халқининг эҳтиёжларидан келиб чиқиб ушбу мамлакатга тезкорлик билан умумий қиймати 200 миллион юанни ташкил қиладиган озиқ-овқат маҳсулотлари, қишки товарлар, вакциналар ва тиббиёт воситаларини тақдим этишга қарор қилди»,— деган Ван И Эрон, Покистон, Тожикистон, Туркманистон ҳамда Ўзбекистон ташқи ишлар вазирлари иштирок этган онлайн учрашувдаги нутқида.
Ван Ининг қўшимча қилишича, Хитой ҳукумати Афғонистонга одамлар ҳаётини яхшилаш бўйича лойиҳаларнинг амалга оширилишида кўмак беришга тайёр.
Аввал АҚШ президенти Жо Байден Россия, Хитой ва бошқа давлатларнинг Афғонистонда ҳукумат тепасига келган «Толибон» ҳаракати билан келишишга уринаётганини маълум қилганди.
«Толибон» август ўрталарида Афғонистонни тўлиқ ўз назоратига олганини эълон қилди ва мамлакатдаги уруш тугаганини билдирди. Толиблар 7 сентябрда мамлакатда муваққат ҳукумат тузилгани ва унинг таркиби тасдиқланганини маълум қилган.
Изоҳ (0)