Xitoy Afg‘onistonga tezkor yordam sifatida oziq-ovqat mahsulotlari, vaksinalar, tibbiy vositalar va qishki tovarlarni taqdim etadi. Ushbu maqsadlar uchun 200 million yuan — taxminan 30 million AQSh dollari miqdorida mablag‘ ajratilgan. Bu haqda Xitoy tashqi ishlar vaziri Van I ma’lum qildi, deb yozmoqda “Kommersant”.
“Xitoy afg‘on xalqining ehtiyojlaridan kelib chiqib ushbu mamlakatga tezkorlik bilan umumiy qiymati 200 million yuanni tashkil qiladigan oziq-ovqat mahsulotlari, qishki tovarlar, vaksinalar va tibbiyot vositalarini taqdim etishga qaror qildi”,— degan Van I Eron, Pokiston, Tojikiston, Turkmaniston hamda O‘zbekiston tashqi ishlar vazirlari ishtirok etgan onlayn uchrashuvdagi nutqida.
Van Ining qo‘shimcha qilishicha, Xitoy hukumati Afg‘onistonga odamlar hayotini yaxshilash bo‘yicha loyihalarning amalga oshirilishida ko‘mak berishga tayyor.
Avval AQSh prezidenti Jo Bayden Rossiya, Xitoy va boshqa davlatlarning Afg‘onistonda hukumat tepasiga kelgan “Tolibon” harakati bilan kelishishga urinayotganini ma’lum qilgandi.
“Tolibon” avgust o‘rtalarida Afg‘onistonni to‘liq o‘z nazoratiga olganini e’lon qildi va mamlakatdagi urush tugaganini bildirdi. Toliblar 7-sentabrda mamlakatda muvaqqat hukumat tuzilgani va uning tarkibi tasdiqlanganini ma’lum qilgan.
Mavzuga doir:
Izoh (0)