Facebook ижтимоий тармоғида Chevrolet’нинг Виржинияда жойлашган дилерлик марказида содир бўлган ўғирликнинг видеоси пайдо бўлди, деб хабар беради Motor.
Автосалон ходимларидан бири томонидан тасвирга олинган кадрлардан кўриш мумкин, номаълум эркак қизил Corvette’ни ўт олдирган ва ҳеч нарсага эътибор қилмай кўргазма зали ҳудудидан чиқиб кетган. Аммо ўғри узоққа қочишга улгурмаган: бир неча даҳа нарида эркакни полиция қўлга олган.
Кўнгилсиз ҳодиса дилерлик марказининг кўргазма залига жойлаштирилган янги спорткарнинг тақдимоти вақтида содир бўлган. Corvette C8 учун тест-драйв назарда тутилмаган бўлса-да, унинг калити салонда бўлган. Жиноятчи эса бундан фойдаланиб, осонликча залдан чиқиб кетган.
https://www.facebook.com/daryle.sykes/videos/854015651916663
Дилерлик маркази ходимлари машина ўғрисини тўхтатишга уринган. Аммо эркак уларга эътибор бермасдан, автосалон ҳудуди бўйлаб бир неча метр юрган ва кескин тезланиш олиб, шоссега чиқиб олган. Автосалон ходимлари зудлик билан ҳолат ҳақида полицияга хабар берган ва у қўлга олинган.
Chevrolet Corvette C8 2019 йилда тақдим этилган. Моделга 490 от кучини тақдим этишга қодир 6,2 литрли В8 ўрнатилган. Агрегат саккиз поғонали робот узатмалар қутиси ёрдамида бошқарилади. Суперкарнинг соатига 100 километр тезликка эришиши учун 2,9 сония кифоя. Айни вақтда АҚШда мазкур купе нархи 61 минг долларни ташкил этади.
Аввалроқ британиялик актёрнинг бир йилда ноёб Ferrari ва яна учта машинаси ўғирлаб кетилгани, америкалик эркак икки ойда иккита бир хил Киа автомобилидан айрилгани тўғрисида хабар берилганди.
Изоҳ (0)