Мюнхенда 7 сентябрь куни очилган Mercedes автосалонида келажакда электр энергиясида ҳаракатланувчи Gelandewagen’нинг серия олди прототипи — Mercedes Concept EQG электройўлтанламаси тақдим этилди, деб хабар беради «Korrespondent.net».
EQG — бу G-Class авлодининг электр энергияда ҳаракатланувчи версияси. Унда ташувчи конструкция сифатида зинали ром сақланган. Дизайни G-Class’даги каби бурчакли. Олд томонида радиатор панжараси имитациясига эга ёруғлик диодларидан иборат ялтироқ қора панел жойлашган. Mercedes’нинг эмблемаси эса 3D-эффект ёрдамида ёритилади.
Concept EQG силлиқланган алюминийли қотишмадан ишланган 22 дюймли ғилдиракларга эга бўлиб, улар ўзининг эксклюзив дизайни билан ажралиб туради. Захира ғилдираги сақланадиган одатдаги жойга қувватлантириш кабелини сақлашга мўлжалланган қулфланувчи қути ўрнатилган.
Электройўлтанламас — ҳар бир ғилдираги учун алоҳида электромоторга эга тўлиқ узатмали модель ҳисобланади. Шунингдек, унда икки поғонали узатмалар қутиси ҳам бўлиб, ёмон йўлларда ҳаракатланиш қобилиятини оширади.
Аввалроқ Mercedes-Benz компанияси Car-to-X Communication тизимини такомиллаштиргани ва йўлда пайдо бўладиган тўсиқлардан огоҳлантирувчи янги функцияни жорий этгани тўғрисида хабар берилганди.
Изоҳ (0)