Continental компанияси Мюнхен автосалони доирасида қисман органик моддалардан ишланган Conti GreenConcept шиналарини тақдим этди. Мазкур шиналар момақаймоқ, гуруч пўстлоғи, шунингдек, ўсимлик ёғи ва қатронидан ишланган. Компания бу каби технологияни 2022 йилдан жорий этишни режалаштирмоқда, деб хабар беради Motor.
Conti GreenConcept шиналарининг 35 фоизи қайта тикланадиган хом ашёлардан иборат: бу момақаймоқлар каучуги, гуруч пўстлоғидан олинган силикатлар, шунингдек, турли ўсимлик мойлари ва қатронлар. Яна 17 фоизи иккиламчи маҳсулотлар ҳисобланади — жумладан, 60 га яқин пластик идишни қайта ишлаш орқали олинган техник углерод ва полиэстер. Полиэстердан Continental тарихда биринчи бор радиал каркас ясаган.
Тажриба шинасининг оғирлиги 7,5 килограммни ташкил этади — бу оддий шинадан 40 фоиз енгил демак. Компаниянинг баҳолашича, тебраниш қаршилиги шу каби синфга кирадиган оммавий шиналарникидан 25 фоизга пастроқ. Бу эса табиийки Conti GreenConcept шиналари «кийгизилган» автомобиль камроқ энергия сарфлашидан далолат беради: электромобил ҳолатида энергия захираси 6 фоизга ортади.
Бундан ташқари, ўзига хос таркиби сабаб шина прототипи протекторни бир неча бор алмаштириш имконини беради, бу эса ўз навбатида «покришка»нинг қолган компонентларини хизмат қилиш муддатини оширади, экологияга салбий таъсирини камайтиради.
Continental 2022 йилдан бошлаб ContiRe.Tex технологиясини оммавий жорий этишни режалаштирмоқда. 2050 йилга бориб эса мутахассислар тўлиқ экологик автомобиль шиналарини ишлаб чиқаришга ўтмоқчи.
Изоҳ (0)