Turkmaniston prezidenti Gurbanguli Berdimuhamedov yaqin kunlarda rasmiy tashrif bilan O‘zbekistonga kelishi kutilmoqda. “Turkmenportal”ning Turkmaniston davlat axborot agentligiga tayanib xabar berishicha, bu haqda 7-sentabr kuni o‘tkazilgan yig‘ilishda Gurbanguli Berdimuhamedov ma’lum qilgan.
Qayd etilishicha, tashrif davomida hamkorlik to‘g‘risidagi hujjatlar to‘plami imzolanadi. Shu munosabat bilan Gurbanguli Berdimuhamedov bosh vazir o‘rinbosari Esenmurat O‘razgeldievga kelasi hafta bo‘lib o‘tadigan savdo-iqtisodiy, ilmiy-texnikaviy va madaniy hamkorlik bo‘yicha o‘zbek-turkman qo‘shma komissiyasi yig‘ilishida o‘zbekistonlik hamkasbi bilan imzolanishga tayyorlanayotgan kelishuvlarni muhokama qilishni topshirdi.
Turkmaniston prezidenti so‘nggi marta O‘zbekistonga 2019-yil noyabr oyida tashrif buyurgan. 2021-yilning avgust oyida ikki davlat rahbari Kaspiy dengizi sohilidagi Avaza milliy sayyohlik zonasida Markaziy Osiyo davlatlari prezidentlarining uchinchi maslahat uchrashuvi doirasida uchrashgandi.
Uchrashuvda avval erishilgan kelishuvlarning bajarilish holati ko‘rib chiqildi. Ijobiy o‘sish sur’atlarni davom ettirish uchun yangi loyihalar ishlab chiqish, chegaradosh hududlar va ishbilarmonlar o‘rtasidagi aloqalarni faollashtirish kerakligi ta’kidlandi. Transport-logistika infratuzilmasini rivojlantirish, Janubiy Osiyo va Janubiy Kavkaz yo‘laklari orqali yangi tashqi bozorlarga chiqish, shu jumladan, Ashxobod bitimiga muvofiq xalqaro transport va tranzit yo‘lagini yaratish istiqbollari muhokama qilingan.
Uchrashuvdan so‘ng Shavkat Mirziyoyev Gurbanguli Berdimuhamedovni o‘zi uchun qulay vaqtda rasmiy tashrifi bilan O‘zbekistonga kelishni taklif etgan.
Izoh (0)