Тошкент шаҳар Шайхонтоҳур туманида 47 ёшли аёл ўзининг 25 ёшли ўғли томонидан пичоқлаб, ўлдирилди. Бу ҳақда Олий суд Жамоатчилик ва оммавий ахборот воситалари билан алоқалар бошқармаси бошлиғи маълум қилди.
Маълум қилинишича, судланувчи 2021 йилнинг 16 март куни соат 02:00 да хонадонида ўз онасини бегона эркакдан рашк қилиб, ошхона пичоғини унинг ўнг томон бўйин орқа юзасига санчиб, ўлдирган.
Сўнгра содир этган жиноятни яшириш мақсадида жасадни ўзи яшаб келган хонадоннинг ертўласига кўмиб қўйган. Шундан сўнг қотил 17 март куни маҳалла инспекторига онасини қидириб топишда ёрдам сўраб, мурожаат қилган. Текширувлар натижасида жасад қотиллик аломатлари билан топилган.
Қайд этилишича, фарзанди кичиклигида эри билан ажрашган аёл бегона эркаклар билан ўзаро муносабатда бўлиши, баъзан уларни уйига олиб келиши ортидан она ва ўғил ўртасида доимий тортишувлар юзага келган.
Жиноятчига нисбатан Жиноят кодексининг 97-модаси (қасддан одам ўлдириш) 1-қисмига кўра, у айбига тўлиқ иқрор бўлгани, уйланмагани каби ҳолатларни инобатга олиб, 10 йил муддатга озодликдан маҳрум қилиш жазоси тайинланган.
Аввалроқ Қашқадарёда бобо уй масаласида жанжаллашиб, набирасини пичоқлаб қўйгани, Жиззахда ука акасини, қайнука келинойисини пичоқлаб ўлдиргани тўғрисида хабар берилганди.
Изоҳ (0)