Украина президенти Владимир Зеленский ўзининг сиёсатга кириб келишини Apple асосчиси Стив Жобснинг фаолият йўлига қиёслади. Стенфорд университетидаги нутқи чоғида Зеленскийнинг айтишича, унинг ҳам кўплаб ғояларига «ҳеч ким ишонмаган».
Украина президентининг қайд этишича, Стив Жобс ўз карьерасини «бир қарашда тентакона ғоялар» билан бошлаган. «Украинада ҳам худди шундай вазият мавжуд. Бир сафар офисда жамоам билан ўтириб ғоялар ишлаб чиққанмиз, уларга эса ҳеч ким ишонч билдирмаган ва худди Стив Жобсга тез-тез айтилган сўзларни эшитганман — бунинг иложи йўқ».
Украина президенти Стив Жобс охир-оқибат муваффақият қозонганини таъкидлади. «Ҳозир менинг қўлимда Жобс ва Apple’нинг ижод маҳсули – iPhone бор, бу Жобснинг юраги ва у ҳалиям уриб турибди. Ҳар бир SMS, ҳар бир суҳбат чоғидаги вибрация унинг юрак уриши », — дея қўшимча қилди Зеленский.
Украина президенти АҚШга амалий ташриф билан келган. 2 сентябрь куни Владимир Зеленский Жо Байден билан учрашди, шундан сўнг Вашингтон демократияни қўллаб-қувватлаш учун Киевга 463 миллион доллар, шунингдек, хавфсизлик ёрдами доирасида 60 миллион долларга яқин маблағ ажратишга қарор қилди. Томонлар, шунингдек, мудофаа соҳасидаги шерикликнинг стратегик асослари тўғрисидаги битимни имзолади ва икки мамлакат ўртасида ишончли алоқа линияси тўғрисида келишиб олди.
Изоҳ (0)