Google Афғонистон ҳукумати амалдорларининг электрон почта ҳисобларига киришни вақтинча тўсиб қўйди.«Толибон»нинг шахсий маълумотлар ва ҳужжатлардан фойдаланишига йўл қўймаслик учун шундай қилинган.
Google’га тегишли Alphabet корпорациясининг маълум қилишича, аккаунтларни ҳимоя қилиш учун вақтинчалик чоралар кўрилмоқда.
Агентлик маълумотларига кўра, Афғонистоннинг 20 та давлат идораси, жумладан, молия, саноат, олий таълим вазирликлари, шунингдек, президент баённомаси идорасининг ўз Google аккаунтлари бўлган. Расмийлардан бирининг айтишича, «Толибон» Афғонистон ҳукумати собиқ амалдорларининг электрон почта хабарлари ёрдамида шахсий маълумотлар ва расмий ёзишмаларга кириш имкониятини қўлга киритиш мумкин деб ҳисоблайди.
Alphabet корпорацияси Афғонистон ҳукумати аккаунтларининг блокланганини тасдиқламади, лекин «ушбу ҳисобларни ҳимоя қилиш учун вақтинчалик чоралар кўрилаётганини» маълум қилди.
Аввалроқ Facebook Афғонистондаги аккаунтлар учун дўстлар рўйхатини кўриш функциясини ўчириб қўйганди.
Ижтимоий тармоқ вакилининг сўзларига кўра, ушбу янгилик Facebook жамоасининг «Толибон» қўлига ўтган Афғонистон давлатидаги абонентларнинг шахсий маълумотлари хавфсизлигини яхшилаш бўйича олиб борган бир ҳафталик меҳнати натижасидир.
Бундан ташқари, Афғонистондаги фойдаланувчилар Facebook’даги ўз саҳифаларини бир амал билан блоклай олади. Бундай аккаунт билан дўст бўлмаган аккаунтлар унинг профилидаги расмларни юклай ҳам олмайди, улаша ҳам олмайди, шунингдек, постларни кўра олмайди.
Изоҳ (0)