АҚШга эвакуация қилинган юзга яқин афғонларнинг террорчи гуруҳлар билан алоқаси бўлиши мумкин. Бу ҳақда NBC икки манбага таяниб хабар берди.
Манбаларга кўра, Афғонистондан АҚШга олиб кетилган 30 мингдан ортиқ одамнинг 10 мингга яқинини қўшимча текширувлардан ўтказиш керак, уларнинг 100 га яқини террорчилар билан алоқада бўлиши мумкин.
Камида икки афғон АҚШдан Косовога олиб кетилади, чунки улар хавфсизлик хизматларини ташвишга солган. Косовода улар қўшимча текширувлардан ўтади. Шу билан бирга, телеканал суҳбатдошларининг таъкидлашича, агар кимгадир «қизил белги» берилган бўлса, бу унинг террорчи эканини ва бошқаларга таҳдид солишини англатмайди. Бу шуни билдирадики, янги келганларнинг шахсий маълумотидаги бирор нарса — уларнинг исми, таржимаи ҳоли ёки телефон рақами хавотир уйғотган. Шу сабабли қўшимча текширувдан ўтмагунча уларнинг АҚШда қолишига йўл қўйилмайди.
АҚШ Афғонистондан америкаликлар ва НАТО фуқароларини, шунингдек, Америка ҳарбийлари билан ишлаган, жумладан, таржимонлик қилган афғонларни эвакуация қилди. 31 август куни АҚШ президент Жо Байденнинг маълум қилишича, икки ҳафтадан кўпроқ вақт ичида Вашингтон Афғонистондан 120 мингдан ортиқ одамни эвакуация қилган.
Шу билан бирга 31 август куни АҚШ Афғонистондан ўз қўшинларини олиб чиқишни якунлади. АҚШнинг Афғонистондаги ҳарбий миссияси қарийб 19 йил-у 11 ой давом этди. Америка қўшинлари мамлакатга 2001 йил 11 сентябрда Нью-Йорк ва Вашингтонда терактлар уюштирган «Ал-Қоида» билан курашиш учун келган эди. Бу АҚШ тарихидаги энг узоқ давом этган уруш бўлди. Унда 2400 дан ортиқ Америка ҳарбий хизматчилари ҳалок бўлди, яна 20 мингдан ортиғи яраланди. Ушбу миссия АҚШга 1-2 триллион долларга тушган. Қўшинларни олиб чиқиш якунлангач, АҚШ президенти Жо Байден Америка халқига мурожаат қилиб, нутқ сўзлади.
Америка ҳарбийлари мамлакатни тарк этгач, «Толибон» ҳаракати Афғонистоннинг тўлиқ мустақилликка эришганини эълон қилди.
Изоҳ (0)