АҚШ Президенти Жо Байден 2001 йил 11 сентябрь терактлари билан боғлиқ ҳукумат ҳужжатларини махфийликдан чиқариш ва эълон қилиш ҳақидаги фармонни имзолади. Бу ҳақда давлат раҳбарининг баёнотига асосланиб, The Washington Post хабар берди.
Фармонга мувофиқ, Адлия вазирлиги ва бошқа бошқармалар ФҚБ томонидан ҳужумлар бўйича олиб борилган тергов ҳужжатларининг очиқланишини назорат қилади. Фармонда, шунингдек, АҚШ бош прокурори ҳужжатларни олти ой ичида эълон қилиши кераклиги айтилган.
Ўз баёнотида Байден шу тарзда сайловолди ваъдасини бажараётганини тушунтирди. «Мен президентликка номзод бўлганимда Америкага 2001 йил 11 сентябрда уюштирилган терактлар тўғрисидаги ҳужжатларни очиқлашни таъминлаш мажбуриятини олганман. Ўша фожиали куннинг 20 йиллигига яқинлашар эканмиз, мен бу мажбуриятни бажараман», — деди Байден.
Август ойида терактлар қурбонларининг қариндошлари, шунингдек, воқеада омон қолганлар ва одамларни қутқаришда иштирок этганлар ҳужумлар ҳақида илгари таснифланган ҳужжатларни ошкор қилишни талаб қилди. Тахминан 1,8 минг киши Байденга хат ёзиб, агар ҳужжатларни махфийликдан чиқариш бўйича кўрсатма бермаса, ундан хотирлаш тадбирларида қатнашмасликни талаб қилган. Уларнинг фикрича, ҳужжатларда Саудия Арабистони раҳбариятининг терактларга алоқадорлигини исботлашга имкон берадиган маълумотлар мавжуд. Мактуб муаллифлари Адлия бошқармаси ва ФҚБ 20 йил давомида «бу маълумотларни сир сақлашга фаол ҳаракат қилгани» ҳақида ёзган ва бунга ортиқ сабр қилмаслигини билдирган.
2001 йилдаги терактлардан сўнг АҚШ ҳукумати 11 сентябрь воқеалари ҳақида қисмларга бўлиб, расмий ҳисобот эълон қилган. 800 дан ортиқ саҳифали ҳисоботнинг охирги 28 саҳифаси 2016 йил июль ойида чиқарилган. Ҳужжатдан маълум бўлишича, Саудия Арабистони ҳукуматига алоқадор бир қанча саудияликлар террорчиларга пул билан ёрдам берган. Бироқ ҳисоботнинг охирги қисмида терактларда Саудия Арабистони ҳукуматининг ҳеч қандай роли кўрсатилмаган.
АҚШда 2001 йил 11 сентябрь куни 19 нафар террорчи тўртта самолётни қўлга олган. Йўловчилар ва экипаж босқинчиларни зарарсизлантиришга уринганда самолётларнинг иккитаси Жаҳон савдо маркази минораларига, биттаси Пентагонга, яна биттаси Шанксвилл шаҳри яқинига қулаб тушган. Воқеаларда ҳаммаси бўлиб 2,9 мингдан ортиқ одам вафот этган. Теракт учун жавобгарликни «Ал-Қоида» террорчилик ташкилоти ўз зиммасига олган. Саудия Арабистони ҳукумати эса ушбу ҳужумларга алоқадорлигини рад этиб келади.
Изоҳ (0)