Наманган вилоятидаги 3 та умумтаълим муассасаси битирувчилари ОТМларга киришда 100 фоизлик натижани қайд этди. Бу ҳақда «Дарё» мухбири Азизбек Абдувалиев хабар бермоқда.
Вилоят халқ таълими бошқармаси матбуот хизматининг маълум қилишича, Косонсой туманидаги 9-давлат ихтисослаштирилган мактаб-интернатини 2020/2021-ўқув йилида 21 нафар ўғил-қиз тамомлаган бўлса, уларнинг 9 нафари давлат гранти, 12 нафари тўлов-шартнома асосида олий таълим муассасаларига қабул қилинди.
Мингбулоқ туманидаги 13-ДИМИнинг 65 нафар битирувчисидан 22 нафари давлат гранти, 43 нафари эса тўлов-шартнома асосида талаба бўлди. Чортоқ туманидаги 5-ДИМИнинг 52 нафар битирувчисининг барчаси ОТМларга қабул қилиниб, 100 фоизлик натижага эришилди.
Чуст туманидаги 52-ихтисослаштирилган давлат умумтаълим мактаби жамоаси ҳам деярли максимал натижани қайд этди. Бу даргоҳнинг 20 нафар битирувчисидан 9 нафари давлат гранти, 10 нафари тўлов-шартнома асосида талабалар сафидан ўрин олди.
Маълумот учун, Наманган вилоятида 2021 йили умумтаълим мактабларини тамомлаган 36 550 нафар битирувчидан 28 293 нафари олий таълим муассасаларига ҳужжат топширган. Улардан 903 нафари муддатидан аввал талабаликка қабул қилинган.
Изоҳ (0)