Namangan viloyatidagi 3 ta umumta’lim muassasasi bitiruvchilari OTMlarga kirishda 100 foizlik natijani qayd etdi. Bu haqda “Daryo” muxbiri Azizbek Abduvaliyev xabar bermoqda.
Viloyat xalq ta’limi boshqarmasi matbuot xizmatining ma’lum qilishicha, Kosonsoy tumanidagi 9-davlat ixtisoslashtirilgan maktab-internatini 2020/2021-o‘quv yilida 21 nafar o‘g‘il-qiz tamomlagan bo‘lsa, ularning 9 nafari davlat granti, 12 nafari to‘lov-shartnoma asosida oliy ta’lim muassasalariga qabul qilindi.
Mingbuloq tumanidagi 13-DIMIning 65 nafar bitiruvchisidan 22 nafari davlat granti, 43 nafari esa to‘lov-shartnoma asosida talaba bo‘ldi. Chortoq tumanidagi 5-DIMIning 52 nafar bitiruvchisining barchasi OTMlarga qabul qilinib, 100 foizlik natijaga erishildi.
Chust tumanidagi 52-ixtisoslashtirilgan davlat umumta’lim maktabi jamoasi ham deyarli maksimal natijani qayd etdi. Bu dargohning 20 nafar bitiruvchisidan 9 nafari davlat granti, 10 nafari to‘lov-shartnoma asosida talabalar safidan o‘rin oldi.
Ma’lumot uchun, Namangan viloyatida 2021-yili umumta’lim maktablarini tamomlagan 36 550 nafar bitiruvchidan 28 293 nafari oliy ta’lim muassasalariga hujjat topshirgan. Ulardan 903 nafari muddatidan avval talabalikka qabul qilingan.
Izoh (0)