Ўзбекистонга 5 ва 6 сентябрь кунлари ZF-UZ-VAC2001 вакцинасининг 4,5 млн дозаси олиб келинади

Ўзбекистонга 5 ва 6 сентябрь кунлари ZF-UZ-VAC2001 вакцинасининг 4,5 миллион дозаси олиб келинади. Бу ҳақда «Вакцинауз» Telegram-канали хабар қилди.

Маълумот учун, шу кунгача Ўзбекистонга мазкур вакцинанинг жами 13,5 миллион дозаси олиб келинди.

ZF-UZ-VAC2001 вакцинаси SARS-CoV2 (RBD) нинг S-оқсилни боғловчи доменга йўналтирилган бўлиб, RBD оқсилининг рекомбинант экспрессияси орқали одамларда нейтраллаштирувчи антитаначаларни келтириб чиқаради ва SARS-CoV2 ни хўжайин ҳужайра юзасида АCЕ2 рецептори билан боғланишини блоклайди ва инфекциянинг олдини олади.

Бундан аввал Германиядан Ўзбекистонга коронавирусга қарши юқори самарага эга 10 минг доза дори воситаси етиб келгани ҳамда Ўзбекистонда коронавирусга қарши тўлиқ эмланганлар сони 2 миллион кишидан ошгани ҳақида хабар берилганди.