Шимолий Корея етакчиси Ким Чен Иннинг интернетда чоп этилган сўнгги фото ва видеотасвирлари кенг муҳокама қилинмоқда. Кадрлар Кимнинг соғлиғи ҳақида янги миш-мишларга сабаб бўлди, деб ёзади Daily Mail.
Интернетда Шимолий Корея раҳбарининг фото ва видеотасвирлари у Пхеняндаги «қийин ва мураккаб» соҳаларда ишлаш учун «кўнгилли равишда» даъвогар бўлиб чиққан талабалар ва мактаб ўқувчилари билан учрашув ўтказганидан сўнг пайдо бўлди. Шимолий Корея давлат оммавий ахборот воситалари томонидан эълон қилинган фотосуратда давлат раҳбарининг жуда озиб кетганини кўриш мумкин.
Ким Чен Ин ўз нутқи чоғида ёшларни ихтиёрий равишда энг қийин ва оғир вазифаларни бажаришга рози бўлгани учун мақтади ва уларни ҳар томонлама қўллаб-қувватлашини айтди.
«Инқилоб қилаётган партиянинг ишончли ворислари, захиралари ва истиқболли асосий кучи бўлиш — бу энг катта ғурур, бойлик ва тараққиёт томон ҳаракатлантирувчи куч», — деди Ким.
«Албатта, катта эҳтимол билан у касал бўлиши мумкин. Балки у вазнини камайтириш учун ва соғлиғида семизлик билан боғлиқ муаммоларнинг олдини олиш мақсадида бариатрик жарроҳлик (ошқозонни кичрайтириш)ни бошдан ўтказгандир», — деди Австралиянинг Дикин университети терроризмга қарши кураш бўйича мутахассиси Грег Бартон.
Июнь ойининг охирида КХДР давлат матбуоти мамлакат раҳбарининг вазн йўқотганини расман тан олди. Шунингдек, Жанубий Корея нашрларида қайд этилишича, унинг бўйи 170 сантиметрни, вазни 140 килограммни ташкил этган, бу 30-40 ёшли одамлар учун меъёрдан ошиқ бўлиб, қандайдир касаллик мавжудлигидан далолат бериши мумкин.
Кимнинг соғлиғи юзасидан оммага камдан кам бериладиган изоҳлар июнь ойининг бошида хорижий таҳлилчилар КХДР етакчиси озиб кетганини қайд этганидан кейин пайдо бўлди. Ким Чен Иннинг соғлиғи ҳақидаги миш-мишлар 2020 йил бошида кучайган.
Август бошида Ким Чен Иннинг бошидаги доғлар унинг соғлиғи ҳақида яна бир мунозарага сабаб бўлганди.
Изоҳ (0)