Қашқадарё ҳокими Зоир Мирзаев Қарши тумани ҳокими Мақсуда Мустафоевани ҳокимликка тавсия қилиб, хатога йўл қўйганини тан олди. Бу ҳақда қашқадарёлик блогер Умид Каримов ёзмоқда.
Қашқадарё вилоятида Капитан Каримов номи билан фаолият юритувчи блогернинг маълумот беришича, вилоят ҳокими бу ҳақда журналист ва блогерлар билан мулоқотида сўз юритган.Блогернинг ёзишича, у Зоир Мирзаевнинг ОАВ вакиллари билан бўлиб ўтган мулоқотида «Қашқадарёдаги ҳокимлардан бири лавозимидан кетиши керак бўлса, кузатув ва таҳлилларимга таяниб, сўнгги вақтларда бир неча бор танқидингизга учраган, ҳаттоки яқинда ҳайфсан ҳам олган Қарши тумани ҳокими Мақсуда Мустафоева дея тахмин қиляпман. Бу қанчалик тўғри?», деган саволни берган.
Қашқадарё ҳокими блогернинг ушбу сўровига жавоб берар экан, «Барчада хато ва камчиликлар бўлади, албатта. Раҳбар сифатида буни танқид қиламан. Яқинда Қарши тумани ҳокими билан суҳбатлашиб, камчиликларини кўрсатдим. Мен бошида унинг ишини кўрмасдан, ҳокимликка тавсия берганимни хатойим деб биламан. Бироқ, айтишим мумкинки, ҳокимларнинг ишдан олиниши кун тартибида йўқ», — деган.
Зоир Мирзаев журналист ва блогерлар билан мулоқотда, шунингдек, вилоятда фаолият юритувчи бошқа ҳокимлар ҳақида ҳам сўз юритган.
«Ҳокимлар ҳам одам, улар ҳам хато қилади. Барчага сўнгги имкон берилади. Бироқ кимдир шу имкониятдан ҳам фойдаланолмай, оддий бир хато билан ишдан кетиб қолиши ҳам мумкин», — деган Зоир Мирзаев.
Эслатиб ўтамиз, Қашқадарёнинг ягона аёл ҳокими Мақсуда Мустафоева интернетда вилоятда фаолият юритган энг йирик пахтачилик кластери Sulton tex group корхонаси раҳбарини селекторларга келмаслик, телефон қўнғироқларига жавоб бермаслик, шунингдек, туман аҳолиси учун боғча ва мактаб қуриб бермасликда айблаш билан танилган. Мустафоева хоним кейинчалик тумандаги 5 нафар аёлга хайрия қилинган 100 миллион сўм пулни улардан уй қуриб бериш баҳонасида олиб, қайтариб бермагани сабаб ҳам жамоатчилик эътиборига тушган. Қайд этиш лозим, 100 миллион сўм можароси оммага ошкор бўлгач, ҳоким уч нафар аёлга 60 миллион сўмни қайтариб беришни ваъда қилса-да, ҳалигача ваъдасининг устидан чиқмаган.
Мавзуга доир:
- «У ё савиясиз, ёки саволлардан қўрқади». Зоир Мирзаев Қарши туманида аҳолига ҳокимсиз мурожаатнома йўлланганини танқид қилди
- «Ҳоким кўтар-кўтар қилса, сизни Қамашига ‘фишт’ қилиб юборишади». Саховат қилинган пулни ололмаган қашқадарёлик аёл ҳокимнинг хизмат хонасида «разбор» қилинганини айтмоқда
- Қарши туман ҳокимининг хизмат хонасида мурожаатчи аёлларни «разбор» қилгани айтилган аёл журналист экани, шу ҳаракати сабаб ишдан бўшатилгани маълум қилинди
Изоҳ (0)