Qashqadaryo hokimi Zoir Mirzayev Qarshi tumani hokimi Maqsuda Mustafoyevani hokimlikka tavsiya qilib, xatoga yo‘l qo‘yganini tan oldi. Bu haqda qashqadaryolik bloger Umid Karimov yozmoqda.
Qashqadaryo viloyatida Kapitan Karimov nomi bilan faoliyat yurituvchi blogerning ma’lumot berishicha, viloyat hokimi bu haqda jurnalist va blogerlar bilan muloqotida so‘z yuritgan.Blogerning yozishicha, u Zoir Mirzayevning OAV vakillari bilan bo‘lib o‘tgan muloqotida “Qashqadaryodagi hokimlardan biri lavozimidan ketishi kerak bo‘lsa, kuzatuv va tahlillarimga tayanib, so‘nggi vaqtlarda bir necha bor tanqidingizga uchragan, hattoki yaqinda hayfsan ham olgan Qarshi tumani hokimi Maqsuda Mustafoyeva deya taxmin qilyapman. Bu qanchalik to‘g‘ri?”, degan savolni bergan.
Qashqadaryo hokimi blogerning ushbu so‘roviga javob berar ekan, “Barchada xato va kamchiliklar bo‘ladi, albatta. Rahbar sifatida buni tanqid qilaman. Yaqinda Qarshi tumani hokimi bilan suhbatlashib, kamchiliklarini ko‘rsatdim. Men boshida uning ishini ko‘rmasdan, hokimlikka tavsiya berganimni xatoyim deb bilaman. Biroq, aytishim mumkinki, hokimlarning ishdan olinishi kun tartibida yo‘q”, — degan.
Zoir Mirzayev jurnalist va blogerlar bilan muloqotda, shuningdek, viloyatda faoliyat yurituvchi boshqa hokimlar haqida ham so‘z yuritgan.
“Hokimlar ham odam, ular ham xato qiladi. Barchaga so‘nggi imkon beriladi. Biroq kimdir shu imkoniyatdan ham foydalanolmay, oddiy bir xato bilan ishdan ketib qolishi ham mumkin”, — degan Zoir Mirzayev.
Eslatib o‘tamiz, Qashqadaryoning yagona ayol hokimi Maqsuda Mustafoyeva internetda viloyatda faoliyat yuritgan eng yirik paxtachilik klasteri Sulton tex group korxonasi rahbarini selektorlarga kelmaslik, telefon qo‘ng‘iroqlariga javob bermaslik, shuningdek, tuman aholisi uchun bog‘cha va maktab qurib bermaslikda ayblash bilan tanilgan. Mustafoyeva xonim keyinchalik tumandagi 5 nafar ayolga xayriya qilingan 100 million so‘m pulni ulardan uy qurib berish bahonasida olib, qaytarib bermagani sabab ham jamoatchilik e’tiboriga tushgan. Qayd etish lozim, 100 million so‘m mojarosi ommaga oshkor bo‘lgach, hokim uch nafar ayolga 60 million so‘mni qaytarib berishni va’da qilsa-da, haligacha va’dasining ustidan chiqmagan.
Mavzuga doir:
- “U yo saviyasiz, yoki savollardan qo‘rqadi”. Zoir Mirzayev Qarshi tumanida aholiga hokimsiz murojaatnoma yo‘llanganini tanqid qildi
- “Hokim ko‘tar-ko‘tar qilsa, sizni Qamashiga ‘fisht’ qilib yuborishadi”. Saxovat qilingan pulni ololmagan qashqadaryolik ayol hokimning xizmat xonasida “razbor” qilinganini aytmoqda
- Qarshi tuman hokimining xizmat xonasida murojaatchi ayollarni “razbor” qilgani aytilgan ayol jurnalist ekani, shu harakati sabab ishdan bo‘shatilgani ma’lum qilindi
Izoh (0)