Дунё ва ўзбек спортига оид 1 сентябрь кунининг муҳим хабарлари дайжести билан танишинг.
Ўзбекистон
Токио шаҳрида Паралимпия ўйинлари давом этмоқда. 1 сентябрь куни мусобақада 4 нафар ўзбекистонлик атлет ўз омадини синаб кўрди. Сабина Суханова Т37 классида 100 метрга югуриш бўйича саралаш баҳсларида 13.91 сония вақт билан маррага 4-ўринда етиб келди ва финал йўлланмасини қўлга киритди. Суханова иштирокидаги финал баҳси 2 сентябрь куни Тошкент вақти билан соат 06:37 да бошланади.Пара-сузувчи Шоҳсанамхон Тошпўлатова S13 классида 100 метр масофага брасс усулида сузиш бўйича финал баҳсларида 1:19,99 дақиқа вақт билан маррага олтинчи бўлиб келди.
Фирдавсбек Мусабеков ҳам S13 классида 100 метр масофага брасс усулида сузишда финал баҳсларида иштирок этиб, 1:05,85 дақиқа вақт билан маррага 4-бўлиб етиб келди.
Яна бир пара-сузувчи Нигорахон Мирзоҳидова эса S13 классида 100 метр масофага брасс усулида сузиш бўйича саралаш баҳсларидан ўта олмади. Мирзоҳидова ушбу масофани 1:28,12 дақиқада босиб ўтди.Жаҳон
«Барселона» ҳужумчиси Антуан Гризманн «Атлетико М»га қайтди. Мадрид клуби франциялик футболчини сотиб олиш мажбурияти билан бир мавсумга ижарага олди. Шунингдек, шартномада ижара муддатини яна бир мавсумга узайтириш банди мавжуд.
«Атлетико» Гризманн ижараси учун 10 миллион евро тўлайди, сотиб олиш эса 40 миллион еврога тушади.
«Барселона» Лионель Мессининг бўш қолган 10-рақамини Ансу Фатига берди. Бу ҳақда клуб матбуот хизмати хабар берди. Фати унгача 31-рақам остида ҳаракат қиларди.
«Манчестер Сити» дарвозабон Эдерсон билан шартномани узайтирди. «Шаҳарликлар» 28 ёшли бразилиялик посбон билан 2026 йилнинг ёзига қадар мўлжалланган янги битим имзолади.
Криштиану Роналдунинг қайтганига қарамай Эрлинг Ҳоланд «Манчестер Юнайтед»нинг асосий трансфер мақсади бўлиб қолмоқда, деб ёзади ESPN.
Шунингдек, 21 ёшли норвегиялик футболчига «Реал», «Манчестер Сити», «ПСЖ» ва «Бавария» клублари қизиқиш билдирмоқда.
Янада кўпроқ футбол ва спорт янгиликларидан бохабар бўлишни истасангиз, «Дарё»нинг Telegram’даги расмий спорт канали — @Daryo_Sport24’га обуна бўлинг!
Изоҳ (0)